李辰安 - 我愛童話｜辰來之筆

人生有幾可見證童話成真？我都算幸運，終於等到與我阿叔同年之查理斯加冕，幾乎想喊出嚟。
 

查理斯發表講話。

查理斯和群眾握手。

人生有幾可見證童話成真？終於等到查理斯加冕。

人生有幾可見證童話成真？終於等到查理斯加冕。

搞個英式宮廷宴 食餐勁？

大家又在中環小酒館享受人生，講起王子，特別有興致。張翁話，香港真係好退步，點解咁講？「世侄，香港係美食天堂，又係中西廚藝薈萃之地，應該度個英式宮廷宴席，早幾個月就接受全球預訂，包一個私人宴會廳，搵班身穿童話服裝男女侍應招呼，食餐勁嘅！」咦，好似幾好橋，以前香港都有Sell過清朝滿漢全席，日本電視台派出記者團採訪，威水呀。

大師兄講開又講，時裝界都要推出皇室系列，尤其是查理斯嘅孫仔、孫女咁得意可愛，一身打扮全球關注，應該推廣一下。「我諗起，香港亦有好多對英國文化有興趣人士，好有雅興扮莎士比亞，復古回到幾百年前，我諗趁勢推出不同款之古典貴族禮服，行出去中環，你都咪話唔哄動。」

「安仔，你咁有橋，不如你着埋套宮廷清裝高興下。」大師兄，你真係九唔搭八，暑假嚟啦，你想我扮黃百鳴？唔好玩啦，靚仔侍應碧咸行過嚟問︰「唔知碧咸有無份去觀禮？」好似唔多覺，我亦唔知披頭四二佬保羅麥卡尼爵士有無到場，因為依家無睇電視直播，而係上網睇精華片段。

大家咁開心，又來一大杯冰凍生啤，歡迎夏天來臨，大家可以去泳池暢泳，出入唔使戴口罩。銀行偉有時會去遊船河應酬，今天應該好旺場。「其實香港最好玩就係遊船河，香港有好多靚海灣，平時大家屈喺石屎森林，出到去海闊天空，你會覺得人生境界完全唔同，香港真係乜到有，大家都唔想走。」

香港近日多咗遊客，但係由於東方之珠乃彈丸之地，郁下都要排隊，小小名氣之店分分鐘排半個鐘都無得食，所以不時有躁底事件發生，放假原本係開心事，千祈唔好焚琴煮鶴。「山東個地方搞燒烤，結果全國知名，連歐美媒體都有報道。」哦，淄博燒烤吖嘛，後生仔去朝聖，因為當地有故事，又充滿人情味，如此這般，燒烤有幾好味不是重點，而係網絡威力可以將呢個城市炒到熱爆。

大師兄都話香港亦有故事︰「我有個內地朋友話，聽人講，去香港尋覓美食，有一個比米芝蓮評分更準確之標準，就係愈名店之招呼愈有性格，愈有態度，做飲食做到反客為主，當門口出面排隊之食客係嚟朝聖，能夠達到如此境界，必然係好食又有風味。」係囉，你去朝聖梗係預咗要守規矩，你去到有成班人殷勤招呼你嘅話，裏面嘅嘢好食極都有限。

 

好彩Keep得好 唔你就心噏

 

對，香港名店有性格有態度，成個大灣區都知，不過，我就無乜耐性排隊，我見到有人排隊就會運路行，無謂啦，有幾好食呢？「世侄，當年香港唔興排隊店，我當年最想就係幫襯大排檔，最想坐係前排凳仔，幾有風味。」不過，張翁話佢伯爺唔多願坐大排檔，更加唔好講踎凳仔。「事關佢成日都着西裝，點坐大排檔呢？」係噃，張翁係富二代，張翁伯爺係有錢人，去上環食魚翅消夜就差唔多。「係呀，我伯爺有帶過我去食翅。」

又想起查理斯，人生都算傳奇，做咗咁耐王子，不知是開心還是心噏，好彩佢仲Keep得好Fit，七十幾歲人依然精神奕奕，講下講下，佢同戴妃大婚好似唔係相隔好耐咁，你話人生過得幾快。好嘞，大家再飲多一杯啤酒，諗下去邊處食晚飯。
 

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ