李辰安 - 好彩無出境｜辰來之筆

中國放五一黃金周大假，可以連破好多個世界紀錄，令人歎為觀止，一切終於回復正常，四名酒友又再聚。
 

五一黃周時，南京中山陵遊客眾多。

假期完結，旅客擠滿高鐵站。

旅客在火車站候車室排隊。

香港也到處人群。

澳門觀光點滿是遊客。

內地遊客去黃山觀光，天黑要入廁所過夜。

大漠遊客忙於接載遊客觀光。

大漠也設有紅綠燈。

遊客爭相玩激流。

西安景區到處是人潮。

黃山觀光 天黑入廁所過夜
 

大師兄話：「安仔，你又話去澳門，有無行手信街？」好在我改變主意，去咗西貢睇下撞唔撞到發哥，先至偷得浮生半日閒，享受清福。張翁皺一下眉頭︰「你當發哥係香港野生保護動物，得閒就去西貢野生捕獵？」發哥喺黃金周去咗銅鑼灣，咁啱畀遊客遇到，成功合照擺上網，變成當日十大新聞。「好多人讚香港明星接地氣，反而內地二三綫小明星不知幾巴閉，成隊人護駕。」銀行偉話內地明星保安呢行養活唔少人，呢一個唔係接地氣問題，而係經濟分配之關鍵，係星都請十幾二十人開路，全國有成千上萬小明星，乘一乘，呢個創造崗位之乘數效應有幾大。

「係啦，今年有一千二百萬大學生畢業，就業都幾困難，後生仔集體去廟宇求籤，真係人浮於事。」大師兄有感而發，我就幫佢斟滿杯啤酒，順下條氣先，呢個世界，好唔好睇得咁好，壞唔好睇得咁壞，我哋人多好辦事，無問題。

「所以話，香港班明星就做壞規矩，你睇『校長』成日返內地，幾個人坐街邊歎美食，半個助手都唔見，其實應該請一百個人幫手開路，呢啲唔係要威，而係促進內地消費。」

唔好講呢啲，原本買船飛去澳門，點知爆棚，有人話搭巴士啦，我就去西貢行山，返到屋企見到澳門手信街人多到你唔信，有網民呻笨，佢話逼咗入去都搵唔到食，打卡店排「蛇餅人龍」，於是返出去是但搵家茶餐廳醫肚，行程完全不似預期，行到想喊咁滯。

「不過，澳門都算好，內地朋友去黃山觀光，乜都無，天黑要入去廁所過夜。」銀行偉話，北京、廣州大塞車，於是乎，放假慘過返工。「我去西貢就幾悠閒，行完山，唔想食海鮮，不如搭的士去將軍澳啦，嗰度有好多商場，千祈唔好落尖沙嘴，太多人啦。」張翁話，中環都算正常，銅鑼灣就人山人海，除咗有發哥，更加有當紅年輕超級巨星出沒，非常熱鬧。
 

廣州出名塞車 要注意交通
 

我問大師兄有無去深水埗覓食？「你都九唔搭八，無啦啦做乜去深水埗，我要飲奶茶咖啡，食腸仔煎蛋公仔麵，樓下都有十幾家畀你揀。」無嘢，深水埗有好多打卡店，乜你無上網睇過KOL介紹咩。講時講，旺角都有好多美食，讀書時代幫襯過唔少鋸扒名店，不過，依家都好似花果飄零，無乜幾家健在。

張翁話，旺角牛扒有特色，尤其是鐵板牛扒，呢一味可算香港美食文化遺產，不過，旺角牛扒有好濃之黑椒汁味，但唔知點解，食落就無牛肉味，不過，勝在食得有氣氛，吱吱聲捧上嚟，出晒煙，齋講都覺得春青返嚟。

今日酒館人氣唔算鼎盛，唔知係咪大假放完之後，大家要休息下。「安仔，幾時去廣州玩，好多香港明星都去廣州打卡。」係噃，搵日去廣州飲早茶都好，聽講當地名店，有過百款粵式點心，唔係香港咁簡單，食來食去都嗰十幾款。
去廣州遲啲可以港車北上，唔知大家有無準備，驅車上廣州，唔塞車都應該幾好玩，更加可以沿途遊樂，去完中山上佛山。「世侄，廣州出名塞車，平時都寸步難行，又無停車位，茶樓老闆去完廣州，叫大家要注意當地交通。」咁就去順德食私房菜，一於咁話，大家再約。

 

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ