李辰安 - 番茄雞蛋漲價 英國人食唔起？｜辰來之筆

早餐特意點了一盤番茄炒蛋多士，我好感動，這個早餐連熱奶茶都係四十七大元，來生我都要做香港人。

一般而言，早餐多數食蛋牛治，晨咁早食茄蛋，大排檔老闆問我係咪食素減肥，我用幾乎奪淚而出的紅紅眼望住佢，問︰「乜你無睇新聞咩？」老實講，近日全世界新聞都集中在一則香港新聞，我咁問法，老闆以為我又係想講這一單，唔係，我係問大家有無睇一則英國新聞。
 

英國番茄漲價。

番茄不斷加價，令英國人吃不消。

番茄是英國人必須食用品。

英國番茄加價，且經常缺貨。

戰事令到全球食物供應緊張。

英國番茄漲價到無朋友

「李生，我同個細女反面，佢話今年一定要移居不列顛，帶埋我兩個寶貝孫女過去，我都未嬲完，你想講乜？」我唔想晨早刺激你，不過，你真係離譜，英國一盒番茄賣幾百蚊港紙，你就無加價，食完呢一個五十蚊有找嘅番茄炒蛋早餐，我應該點講好呢？老闆莫名其妙，佢都費事理我，繼續去沖絲襪奶茶。

等到黃昏酒聚，我同一眾酒友講今朝發生之故事，大家都好有同感。「世侄，依家環境令我想起小朋友時代，成日聽到大人話︰打到嚟啦，事實上，上世紀六十年代係爆發第三次大戰之高風險期，老一輩想起三年零八個月，睇下當時國際風雲局勢，有感而發。」大師兄話︰「安仔，你估淨係英國番茄漲價到無朋友，一場俄烏戰事令到全球食物供應斷鏈兼甩轆，美國、日本同英國都買唔到蛋，有得你買都好貴。」

有英國民眾到超市搶價。

英國超市的貨架不時缺貨。

英國超市的貨架不時缺貨。

台灣最近雞蛋供應也非常緊張。

雞蛋是最平價之蛋白質食物。

其實，香港雞蛋都好貴，之不過，大家可能消費力高，十幾蚊半打雞蛋視等閒，其他地方市民已經感到要上街組織「美麗風景綫」之地步。「辰哥，你就幸運，早餐食番茄炒蛋，小心畀人家仇富。」英國有位女部長認真堅離地，對於英國番茄、雞蛋等民生食用品漲價視若無睹，呼籲打工仔可以加班或者秘撈賺些少番茄錢。「係呀，呢位大人仲叫人無錢就唔好食生菜、番茄，可以食紅蘿蔔。」

發達國家無啖好食
 

大家真係有少少義憤填膺，於是Order一輪生啤，冷靜一下。美國有議員憂慮雞蛋問題，因為雞蛋係最平價之蛋白質食物，大家都無消費力食牛排之時，連蛋都貴到飛起，點算好？「歐美有班人好儍好天真，世界太平盛世之時，竟然話要保護環境，推廣全球食昆蟲代替肉類，講到天花亂墜，又真係有進步人士話好嘢，叫大家支持。」張翁大口呷了半杯啤酒，唉一聲，佢話︰「我細路仔時，香港有人賣和味龍，你知係乜？」

原來和味龍即係水曱甴，先用熱水灼熟，然後油炸，加重五香粉炒製，係香港上世紀五、六十年代之民間食品，還有炸蟬，嘩，睇見都暈。「張翁，上網就知啦，不過，香港當年真係咁窮，食水曱甴當鋸排，我讀得書少，你唔好呃我呀。」
「我睇過《巴比龍》，德斯汀荷夫曼在獄中食曱甴，係因為呢種昆蟲有高度蛋白質。」大師兄，我都有睇過洪金寶電影，都有食曱甴之場面，想唔到呢種求生術可以當美食。「安仔，曱甴唔同水曱甴，更加唔係和味龍，你都真係九唔搭八。」
無所謂啦，今日有酒今日醉，有得飲好飲，唔好講咁多。「世侄，居安思危，當你又可以食到番茄炒蛋多士之時，記得感恩。」係，等陣食晚飯，要有生菜、大大嚿中式牛柳，同時要食乾食淨，真係食唔晒，都要打包返屋企，

你知道英國、美國、日本以上發達國家都無啖好食，更何況非洲及戰亂國家，飲杯，祝願世界和平，大家有安樂番茄食。

 

《星島申訴王》於3月1日隆重登場，節目為民請命抱不平、追蹤城中熱話，亦會搜羅溫情小故事。你申訴，我跟進，搵91999933，《星島申訴王》隨時候命！
立即報料：https://bit.ly/3IMunqd
你的獨家報料一旦被採用及報導，將獲得乙份獎品。

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ