李辰安 - 馬斯克與牛河兜亂｜辰來之筆

朋友奔走相告，2023年有望自駕遊上大灣區，大家興奮之餘，原來自己仲未係車主，養架車要幾錢先？
我係集體運輸忠實「粉絲」，出身咁耐只係考到牌嗰陣同朋友夾錢養過車，不過半年就要分手，因為消費幾貴，尤其是要租停車場，一個星期當我隔日都揸出去遊車河，油費、隧道費同泊車費，再加埋有時食「牛肉乾」，計起上嚟我同嗰半部車打工，試過就算。香港乜都有，巴士愈嚟愈豪華舒適，港鐵愈開愈多綫，大家樂在其中。除非好似阿姐咁幸運，抽到架車呢，我或者會考慮做車主。

「安仔，你都九唔搭八，抽獎抽到你，咁不如你去《中年好聲音》睇下有無機會出位啦。」今日大家假後重聚，當然要食餐好嘅，成籠叉燒包熱氣騰騰，本來好有食欲，點知忽然畀人窒到應，唔好食包啦，費事梗親，都係揀燒賣，細細粒容易食。「世侄都有台型㗎，執下佢，減十零磅，都可以見得觀眾。」我心諗，《中年好聲音》同做車主有乜關係？大師兄繼續講︰「嗱，你做咗歌星，未來收入好似校長咁，你咪可以買車，抽獎中車就好難有你份。」原來做校長容易過做阿姐，你講㗎，咁嘅邏輯唔知你想講乜。

銀行偉係車主，德國名車威水呀，有無諗過上去廣東省遊下車河？「我一定支持國家送畀香港人之大禮啦，港車北上可以唔做申請兩地牌，好簡單，講咁快可以過港珠澳大橋，好過去北海道自駕遊，第二時大家可以去珠海或者澳門飲茶都得噃。」

我問大師兄會唔會買番架車呢？「安仔，到時會有租車服務，唔好搵啲錢咁樣花費。」食完蝦餃再叫多籠山竹牛肉，事關叉燒包已經掃晒，我想講，大師兄真係唔經大腦，又唔係幾識計數，你有成層市區三房樓，賣咗佢，套現返珠海或者中山住，日日揸車有幾煩呢？十幾二年前，我哋往來屯門都要三、四個鐘啦。當然，我無咁講出口，費事又畀人窒。

「我哋揸自己架車北上，係右軚，上高係左軚，似乎有少少唔習慣，仲有遇到有事故，人生路不熟，好騰雞噃。」銀行偉從車主角度出發，又真係有道理，不過，依家智能汽車發展得咁快，講唔定三兩年之後已有無人駕駛汽車，大家坐定定，唔使分左軚定係右軚，全部新款汽車係中軚，咁又得唔得呢？

銀行偉話，國產電動車好厲害，先幾年就話馬斯克（見圖）出品之電動車前衞先進，今時今日可能畀「中國製造」過頭，真係率先有無人駕駛型號都未定。「係噃，馬斯克呢排好多負面新聞，佢架車啲股價跌到好慘。」大家近日食得西餐多，今日要盡情食炒粉麵，加個豆腐海鮮湯，滋味呀！

我問銀行偉點睇馬斯克，佢話呢位科技大亨就好似呢碟豉椒牛河咁，兜亂！點解？「佢人叻，不過正正係太過叻，做乜都可以馬上做得到，佢原本做網上支付，忽然又去揸火箭探火星，仲有霸住個電動車市場，一個人打幾個位置，但係今次再要玩埋社交媒體，咁就真係多咗，變咗吊吊揈，於是一沉百踩，股價散檔。」

其實，點解豉椒牛河要兜亂，我同大師兄喺鄉下大學飯堂食嘅，好似無兜亂。好啦，食嘢，唔好講咁多。「世侄，識食先至要食兜亂牛河，不過做人做事就唔好咁啦。」明白，你又擺錢落我袋，做人要學鴻圖窩麵，有料又有分量，整整齊齊，係喎。