千奇百趣｜舖頭貓攝影比賽 海洋生物潛攝大賽 最難影係咩題材 有咩國際賽值得參加
2022-11-11 00:00 
貓店長百態全捕捉
作為貓奴嘅小編，一見到呢個POST「舖頭貓」攝影比賽就忍唔住同網友分享，呢個攝影比賽齋睇題目已經好清楚知道主題，簡單嚟講就係去影低，你平時有見過嘅「貓店長」，然後附上標題、拍攝地點及拍攝器材等資料交俾大會，另以不多於200字嘅中文字，分享拍攝意念、跟「舖頭貓」與店鋪相關嘅故事，截止報名日期係11月30日，如果想參加就要快啲實地考察，幫你相屬社區嘅「店長」拍返啲沙龍照啦，佢同你分分鐘一鏡成名，出名過忌廉哥㗎。
查詢︰https://ideal-bookstores.com/competition3/
潛水員限定水底攝影
講開攝影比賽，其實香港每年都有唔同機構會舉辦賽事，而且好多比賽題目，都係大家意想不到嘅，包括專為潛水員而設的「香港潛攝大賽」，舉辦目的係為咗令大家更加珍惜香港海洋資源，宣傳香港海洋生態及海洋生物之美，加強公眾對海洋環保的意識，於是由漁護署及香港潛水總會合辦嘅呢個賽事，由2012年開始就一直舉辦至2021年，不過礙於疫情問題，得獎作品只係有限度响兩大商場展出，仲設立咗網上虛擬展覽。但係今年就一直未有消息，似乎2022年度嘅比賽就未必會舉行，又或者各位潛水員儲定相先，總有出頭機會嘅。
查詢︰https://www.afcd.gov.hk/tc_chi/conservation/con_mar/con_mar_edu/photo_com_2021.html
網上虛擬展覽︰https://www.golocal360.co/HKUPVC2021/index.htm
拍山頂纜車有機會贏Fujifilm相機
無論係「巴膠」、「電車男」呢啲稱呼有幾咁差都好，總之對於交通工具嘅熱情與愛載，旁人係唔會明。但講到交通工具嘅攝影比賽，就無論你係咩人都可以參加嘅。由於第六代山頂纜車已於今年嘅8月27號投入服務，為咗慶祝呢件盛事，山頂纜車聯乘 DCFever 合辦《經典重現 • 第六代山頂纜車攝影比賽》，等大家可以發揮你嘅創意，用常人睇唔到嘅視覺去呈現山頂纜車同沿途風景嘅優美與獨特性。截止日期係11月16日，所以話......唔好急但最緊要快，而冠軍就有機會獲得Fujifilm相機X-T3連XF18-55mm相機套裝。
查詢︰https://www.dcfever.com/news/readnews.php?id=33753
有咩攝影比賽最難搞？
講到攝影比賽嘅主題，最容易影就係有晒特定主題同範圍嘅，例如上述幾項都係主題鮮明，纜車就纜車、舖頭貓就舖頭貓，唔需要傷腦筋諗太多，只係集中响故事性及構圖想表達啲咩，但有一類比賽係連主題都有啲難度，例如曾有機構舉辦過主題為「啟發人心正面能量」，呢類主題就比較講情感，範圍好大，就真係要自己發揮。另外小編又見過有一主題為「集點香港」嘅攝影比賽，原來係以「建築」為主題，呢類題目最難搞，但相對發揮空間大，大家不妨又試下挑戰。
想衝出國際要玩呢啲
如果你參加攝影比較想出名，咁就要揀啲國際性少少嘅大賽啦，例如由即日起至12月5日截止報名嘅「香港攝影大賽2022」，由國家地理雜誌主辦，比賽區分多個組別，包括風景、生態、城市、人物、手機及短片等，絕對係高手過招嘅大型賽事。另外，Sony 世界攝影大獎賽，亦係一個好正嘅攝影大賽，如果本身已經係响攝影界工作，不妨參加專業組別賽事，另外仲設社會、學生及青年組，參賽者最高有機會獲得獎金25,000美元，亦能獲得Sony網站內全球曝光的機會。
查詢︰https://www.worldphoto.org/competitions
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應