日本新出蟹肉雪糕啖啖蟹肉超正炸蠔雪糕+柳葉魚新地

2022-11-09 00:00

早前有銅鑼灣餐廳聯乘蠟筆小新，推出「雪糕咖哩飯」，成功製造話題，令大家又開始關注雪糕。講到「新派雪糕」，日本可說是姣姣者。著名飲食集團蟹道樂近日就推出蟹肉雪糕，蟹味雪糕可能都聽過，但雲呢拿味的雪糕內藏真蟹肉你又食過未？有日本網民已率先試食，大多數認為蟹肉雪糕零伏味，值得推薦。打開盒蓋已聞到濃濃蟹味，雪糕溶入口中，口感像在吃奶白色的蟹肉高湯，完全沒有預想中的怪味，換來是鮮甜香氣。溫馨提示，蟹肉雪糕只在蟹道樂道頓堀本店先有得食，準備去大阪的你，在道頓堀買完嘢打完卡記得去試食喇！

唔止大阪，岡山同北海道都分別有唔同種類的「海鮮雪糕」。岡山日生町的五味の市cafe，推出炸蠔雪糕，雪糕上放上了兩隻炸蠔再淋上醬油，味道方面，估佢唔到炸蠔配雪糕係零違和感。北海道方面則有柳葉魚新地，外形騎呢，曾吸引唔少日本KOL同Youtuber去試食，話題性十足。