東京年尾必做9件事｜唔使排隊食米芝蓮拉麵 豐洲市場平食海鮮 睇埋最新聖誕燈飾+巨型高達
2022-11-08 00:00 
0+3實施以來，香港最多人出遊的地方，毫無懸念非日本莫屬。但年尾遊日本，光是一張廉航機票，連稅叫價已過6千，令不少人卻步。凡事有兩面，機票雖貴，但日圓現時繼續低水兌5.3，而且內地仍堅持清零政策，2023年前估計日本不會有大量內地旅客湧現，仲唔係遊日好時機？小編為大家整合了早前著名旅遊達人林氏璧推介年尾出遊東京必做9件事，一於將前幾年儲定的彈藥傾巢而出，食買玩大一網打盡！
必食3大人氣拉麵店
米芝蓮早已同「排隊」掛鉤，想食米芝蓮級數拉麵又唔想排隊？而家唔食等幾時？香港的日本過江龍拉麵碗碗過百港元，在日本食，80港元有找。推介創作麵工房鳴龍，自2016年拿下米芝蓮必比登推介後，其後連續5年晉升至米芝蓮一星推介，成為東京拉麵唯一連續獲獎最多的拉麵店。日本國民組合嵐Arashi的櫻井翔都成係常客。鳴龍的湯底，以雞肉、豚肉、昆布及牡蠣熬煮，層次豐富，還加入蘋果醋、黑醋調味，仲有秘製胡麻醬。
另一推介是入鹿Tokyo，在日本版Openrice「食べログ網站」評分有3.92（5為滿分）。入鹿Tokyo的招牌名物是牛肝菌醬油拉麵，湯底用了名古屋地雞、鹿兒島黑豬等熬出高湯，湯底極之鮮甜。第3間要推薦的是麵屋彩音，為日本少見的拉麵配日本酒主題拉麵店。麵屋彩音主要提供醬油、鹽味、小魚乾拌麵三款不同口味拉麵，店主會按照食客所揀的拉麵口味來配搭適合的日本酒。麵屋彩音另一賣點是拉麵相當抵食，850日圓（約54港元）就有一碗。
追加！東京最新食場：https://bit.ly/3E7pbuG
豐洲市場平食海鮮
豐洲市場今年4月尾重新開業，共有39間店，海鮮丼、和食店、cafe、壽司店等一網打盡。想食海鮮丼，首推壽司大。壽司大在築地時已極之出名，搬去豐洲市場後依然人氣不減。店長推薦套餐有海膽、鯛魚、秋刀魚等10款壽司及1份手卷，叫價只係約267港元，超抵食！天婦羅方面則推介天房，其天婦羅外皮酥脆，薄到令人忘記它是炸物，完全不覺得油膩。
豐洲市場網址：https://bit.ly/3TdRfkC
澀谷新地標宮下公園
澀谷區的宮下公園Miyashita Park，為一個長330米的複合式空間，串連澀谷站及原宿站，集合精品、餐飲、名牌等90多間店舖於一身，仲有空中公園，為東京中心區最新的一站式商場。商場的空中花園勁吸睛，有人工草地夠晒chill。仲有滑板場、攀石場、沙灘排球等運動設施。位於Miyashita Park 1樓的澀谷橫丁，集合全國各地美食，由北海道食到沖繩，亦有相撲料理、喫茶店、小酒館等19間店舖相連，搵食冇難度。
已結業東京景點一覽，唔好摸門釘：https://bit.ly/3zPcF0q
Shibuya Sky展望台
由宮下公園Miyashita Park步行10分鐘，就到Shibuya Sky展望台。雖然Shibuya Sky已開幕近3年，但對於足足有兩年多沒有出遊的港人來說，這個展望台一樣都是新地標。坐上電梯直上Shibuya Sky，一邊乘搭一邊俯瞰澀谷大馬路景。在展望台上，可看到東京鐵塔及東京晴空塔，天氣好時仲可遠眺東京灣同富士山靚景。國民組合嵐Arashi的歌曲《Turning Up》都在Shibuya Sky展望台取景，成功製造話題，吸引唔少人去打卡。
Shibuya Sky網址：https://www.shibuya-scramble-square.com/
動物鬧市踩場！3D廣告呃like
日本東京、韓國首爾的街頭，都不時出現3D廣告，在鬧市中帶來不一樣的震撼感。Cross新宿大廈在去年設置了一個L型的屏幕，播放逼真的3D影像。第一彈是萌爆貓咪，巨型貓咪就像從大廈伸出頭來，極之引人注目，吸引好多人去打卡。今年7月，唔止新宿，連涉谷都有立體廣告，主角是3D秋田犬，更設置8面屏幕同時播放，每小時整點時間，秋田犬會出來報時，想影相要夾啱時間。不知閣下下次到東京出遊，又會有咩3D動物在鬧市中畀驚喜大家？
東京其他必衝新景點： https://bit.ly/3NIEk99
虎之門之丘
虎之門之丘一帶早在2015年已開業，雖經歷Covid年代，但亦不斷有新點進駐。搵食要去虎之門橫丁，位於大廈的3樓，大多數食店都為半開放式空間，落地玻璃窗設計，採光十足之餘又增添年輕感。虎之門橫丁有日本料理、中華料理、意大利餐廳、法式餐館、酒吧等26間食肆選擇。其中70年串燒老店鳥茂、銀座日本料理餐廳器樂亭都係推薦之選。Urban Research及Urban Famima!!可以瘋狂shopping，襯住日圓低水去掃貨！
虎之門之丘網址：https://www.toranomonhills.com/
浪漫唯美聖誕燈飾
東京大大小小商場及各大街頭，對聖誕裝飾從來都不遺餘力。最快11月頭已有最新聖誕裝飾睇，最耐去到翌年2月都仲有得睇。必睇是六本木的聖誕燈飾，馬路兩邊掛起了70萬個藍白色燈泡，彷如一陣浩瀚又唯美的雪景。東京惠比壽花園廣場，以歐式建築為主，廣場內的Baccarat水晶吊燈，以8,500塊水晶片在250座燈光反射下一併發出光芒，感覺置身在是歐洲宮廷。
六本木燈飾網址：https://www.roppongihills.com/
東京惠比壽花園廣場網址：https://gardenplace.jp/special/2019christmas/
橫濱高達
從東京鬧市行遠點，一樣有今年必訪景點。橫濱山下埠頭的實物巨型高達「GUNDAM FACTORY YOKOHAMA」，7月重新開業，早前決定延長展期至明年年頭。高18米、重25公噸，與動畫原著機型同等大小的高達，從老遠見到已極之吸睛。巨型高達雖不是新鮮事，但橫濱這個真係可以「動起來」，難怪全球高達忠粉都為之瘋狂！
高達網址：https://gundam-factory.net/
東京迪士尼
唔少Youtuber在其頻道拍片分享大阪USJ有全新Mario園區，但光是日本人已逼爆場，都唔好話港人去旅行了。同一段日子，東京迪士尼似乎沒有逼爆現象。園區暫時不算多人，加上聖誕時節，東京迪士尼將會有大量聖誕主題活動，巡遊、餐飲、周邊產品唔少得，仲有怪誕城之夜主題，一班朋友去玩返兩日就最啱喇。
東京迪士尼網址：https://www.tokyodisneyresort.jp/top.html
圖片來源：食べログ網站、PRTIMES、網上圖片
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
最新回應