親子好去處｜全港首個樂高主題跑豐富紀念品獎牌自己動手砌送別注T恤

2022-08-24 00:00

樂高今年90週年，慶祝活動多籮籮。今次要大家一齊動起來！召集一眾樂高迷參加全港首個「樂高90週年玩樂跑」。活動分為「全速跑」、「玩樂跑」及「歡樂陣」，設有個人、家庭及朋友組別，適合不同年齡層人士根據個人能力而報名，無論係貪玩一族定係運動好手都可以跑埋一份！

「全速跑」為運動愛好者而設，分為2、3及5公里距離，就算唔係贏頭3名，於指定時間內完成賽事的參加者都可獲贈「全速跑」限定禮品包，有防水袋、毛巾、tote bag。「玩樂跑」則分為1及3公里，路線上設有4個玩樂站，參加者可一邊跑步一邊砌樂高，真係「Fun」秒必爭，超新穎的比賽方式！完成賽事當然都有禮品包喇。完成「全速跑」及「玩樂跑」的參加者，均可獲樂高紀念獎牌一枚。獎牌設計融入香港元素、地標，不但可以自己砌出獎牌，更可把個人化的樂高人仔，砌於中央位置，成為你的專屬紀念獎牌。而「歡樂陣」就是將戶外定向融入樂高拼砌的活動，當中有「暈陀陀障礙賽」、「攀登樂高牆」等玩樂設施。仲有趣怪打卡位及其他鬥智鬥力樂高遊戲體驗。「歡樂陣」的每隊參加者，除了禮品包，更可得到此組別限定的摺疊野餐帳蓬一個。每個比賽都有自己專屬獎品、紀念品，諗唔到參加邊個？一於玩晒3個喇！