中式糖水｜3 大米芝蓮推薦老字號中式糖水舖

近幾年走新派甜品路線的店舖開到成行成市，點創新點西式都好，中式糖水的味道、情懷沒有其他東西可代替。以下介紹 3 間獲米芝蓮推薦的老字號中式糖水店。

佳佳甜品
開業近 40 年，連續 6 年獲「米芝蓮街頭小食」稱號，深受食客歡迎，連周潤發都成日幫襯。佳佳仲開埋台灣分店，認真巴閉。必食為生磨合桃糊、杏仁糊及芝麻糊，食材都係百分百自家洗、浸、炒、磨同煮，絕對是費心思之作。另一招牌薑汁湯丸，湯丸皮薄足料，薑湯夠辣夠濃亦富辛香。

地址：佐敦寧波街 29 號地舖

蘭苑饎館
有太子及荃灣分店，連續多年獲米芝蓮推介。裝修以傳統木製家具和青花瓷器為主，相當古色古香。店內有雪耳木瓜、西米露、合桃露、中式糕點等。必食的開心果糊，顏色呈青綠色似足鬼口水。食落先發覺原來香濃幼滑，網民大愛。

地址：太子西洋菜北街 318 號集賢樓地舖 / 荃灣兆和街 23 號 10 號舖

福元湯圓
同樣都係米芝蓮推介的福元湯圓，以自家製湯圓聞名。粒粒皮薄煙韌，足料爆餡。唔止餡料毫不吝嗇，口味亦有多款可揀。另外凍綠豆涼粉、雞蛋腐竹糖水等亦不可錯過。

地址：炮台山福元街7號利都樓地下 I-1 舖

星島新聞集團慶回歸25周年專題網站，請即瀏覽
https://bit.ly/39AQC3m