芬蘭航空｜獨家限定 另類新航線飛越北極圈
2022-03-22 00:00 
坐戰機、觀光直升機可獲證書就聽過，有冇諗過坐民航機都有證書？
話說芬蘭航空係全球首家提供日本東京飛往歐洲航班的航空公司，由東飛到西，近11小時的飛行時間路線橫跨韓國、蒙古同俄羅斯領土。航線因新冠肺炎疫情及俄烏局勢停飛了一排，復飛後，俄羅斯卻在2月尾強烈讉責芬蘭航空飛越其領空，令航線再次被停飛。來到3月，芬蘭航空重新規劃東京成田飛赫爾辛基的AY073航班。新航線為了避開俄羅斯上空，飛行時間由原本11小時加多了2小時，總距離近8,000英里，而且要飛往更北地區，完全進入北極圈範圍。只要乘搭此航線的每位乘客，都獲芬蘭航空送贈「飛越北極圈證書」及國民卡通姆明貼紙。 
芬蘭航空早在1983年已曾飛越北極圈，事隔39年再飛過
點解要畀證書？皆因要安然無恙跨越北極圈一點也不易。燃油、風速、飛行路徑等計算都比普通路線難度要高，極地天氣更是變幻莫測，唔係世界級機師都飛唔到。芬蘭航空機師Aleksi Kuosmanen仲話：「可以飛越北極圈係每個長途機機長的bucket list之一。」下次Landing的時候，麻煩各位乘客大力鼓掌，除了開心自己安全着陸，更要歌頌各位機長的專業。點會估到有幸可以繞過世界面積第一大國仲要入埋北極圈先去到北歐咁迂迴曲折？呢個仲唔係亂世下的獨家限定證書？
關鍵字
最新回應