辰來之筆｜鹹魚遊戲，又如何？

阿叔問我有無睇《魷魚遊戲》（見圖），我望下佢，乜你似睇呢類潮劇咩？佢窒返我轉頭︰「世侄，你有無裝Netflix㗎？」　

行落去樓下飲奶茶，見到哎呀阿叔，大家原來是同鄉，所以尊稱佢係阿叔，佢六十到尾，平日都係見佢老老套套睇馬經報章，有時仲會聽收音機派彩，冷不提防呢位阿叔叻到通過平板電腦睇潮劇。「阿叔，我多嘢做，最近又諗住寫網絡小說，咁咪無乜注意娛樂囉。」如此回應十分得體，無人話你知我唔多曉網上煲劇，更加無去追呢套人人都話睇過之話題韓劇。阿叔話︰「你寫網劇就更加要睇啦，唔係點知市場興乜嘢？你唔好話你想學金庸、古龍咁，寫武俠小說，吓哇！」阿叔，我要返Office，得閒再傾。

返到Office我依然心不在焉，我唔係因為無睇呢套潮劇而感羞愧，而係韓國仔不外抄炒摷埋舊橋而已，日本早有《大逃殺》呢類電影啦，二十年前啦，我仲記得戲中有北野武，都係成班絕望青少年玩死亡遊戲，淘汰到最後一個，喂，o依家韓劇又再來一次，你話同寫武俠小說有幾大分別？都係炒冷飯啫。我問下IT後生仔有乜睇法，佢話︰「李Sir，你可以翻炒一部港式《魷魚遊戲》，角色換咗係本土人物就OK啦！」好，你快啲幫我下載個煲劇App先……

我其實可以跳脫一點，不如寫個《鹹魚遊戲》小說，你話好唔好？好快又到星期五黃昏，打風都要唞下吹下水，你話天文台幾好，呢排成日要幫我哋掛風球，令全港市民生活增加冒險刺激元素，大家唔使咁悶。「安仔，我哋魷魚，你就鹹魚，搞乜鬼，正正經經寫AI鬼故好啦，又要學人潮，你邊度潮呢？」

大師兄，大家不如先來一杯雞尾酒先啦，反正其他酒友未到。「我構想好簡單，呢個香港死亡遊戲是人人派一條鹹魚，你只要拆開條鹹魚，打開魚肚就可以知道得到乜嘢籌，唔同籌有唔同遊戲，個個遊戲都係挑戰死神，明未？」銀行偉已經到埗，佢話︰「安哥，會唔會抽到八號風球兼黑雨都要返工呢條籌先？」

張翁已經拎埋一支威士忌同大家見面，好嘢，大家又有福利啦。據佢老人家記憶之中，上世紀七十、八十年代西片都有類似之獵殺淘汰遊戲之電影。「我唔記得戲名，不過劇情大概係有一班土豪有大把錢，於是搵一班窮鬼當獵物，畀個時間你去逃跑，然後土豪就會拖埋獵犬過嚟搵佢哋，見一個嘭一個，走得甩有巨獎。」

大師兄話︰「呢套戲反映西方當時嘅時代背景，由於資本主義發展到極端程度，貧富懸殊到大家頂唔順，於是令創作人萌生呢類有錢可以操生殺之權咁變態之地步，當然啦，自由市場吖嘛，劇中人一定唔係奴隸或者被專制壓逼啦，所以要設計呢個有獎金之遊戲，有無命攞獎金係其次，最緊要人人有機會，就好似資本主義自由市場原則咁，公平呀！」

大師兄，你好似返番去大學時代，你咁有批判思想，是否杯雞尾酒酒精度過高呢？「我都記得當時之時代背景，不過幾十年前，韓國電影根本唔見影，只有日本片比較受國際關注。」係啦，韓國已取代日本成為亞洲娛樂文化之代表，唉，香港就真係無影。「唔係噃，香港都有《無間道》輸出，之不過近幾年靜晒啫。」

好啦，閒話少說，大家不如諗下我本《鹹魚遊戲》應該點開頭！「你可以設計一班人去完梳打埠，貢獻所有身家之餘，更加欠下社團七八位數字賭債，成班人話明無錢還，於是社團要佢哋去西貢一齊玩《鹹魚遊戲》，過到六個大關，剩低最後一人不單止可以唔使還錢，仲可以再送三百萬泥碼過你。」

「辰哥，呢個題材好敏感，又好似不太健康，你不如諗過另一個場景好啦！」大師兄換上威士忌加冰，開口就話︰「安仔，你都九唔搭八，咁嘅橋都諗得出，你真係不學無術。」張翁話︰「你都係跟番李小龍《龍爭虎鬥》啦，講一班功夫高手應約，去石堅嗰個神秘島打淘汰擂台。」功夫高手不是為錢，而係為榮譽，為爭武林第一位，這是香港武俠文化，又正氣，又健康，都係好橋。當中你可以設計不同比武場面。

但係，條橋好似舊啲，不過算啦，橋唔怕舊最緊要受，有得諗。