唔通皇室有冤情？——辰來之筆(李辰安)

（作者李辰安，從事創作二十年，開拓城市感覺派文風，與讀者一起懷舊，穿越香港時空找尋生活新旨情。）

一向覺得好有親切感，如同一家人之英國皇室傳出突發新聞，二王子哈里忽然劈炮唔撈，退出皇室成員身分，追求獨立自主生活。

本來想好咗內容，同大家講下平行宇宙呢個題材，點知中間爆出呢單料，想講番兩句感受，然後先至入正題，好唔好？「辰哥，英國咁遠，關大家乜事？」香港好多人當英女皇係一家人，知無？好多人亦好似我咁，睇住戴妃嫁入豪門，亦睇住哈里仔長大，對英國皇室好有感情。銀行偉依然咬住唔放，佢問︰「唔通你想講下當日戴妃巴黎車禍之事？」無此打算，之不過我忽然聯想起，白金漢宮似愛倫坡筆下《厄舍府的倒塌》多啲，皇室家族經過幾百年發展，應該收藏了不少奇情怪事啫。例如有巴黎人話戴妃其實未死，當日從隧道失事汽車被救出的不是真人，仲有人話見過佢在巴黎出現。

好嘞，講下講下就返到我上次所講之劇情發展，過往，大家只係識得講冤魂不散，依家可以歸納為平行宇宙。「安仔，我睇穿你攏嘢啦，你想話戴妃去咗隔籬個宇宙，即係一個不同維度的世界之上，哈里仔感覺到母親仍在，又或者曾經去過這一個平行時空，同戴妃傾過偈，知道當日巴黎車禍另有內情。」對，大師兄你真係一點就明，故事就係一如你想像，不過，唔該交番個場畀我，你再講落去，咁我咪變咗聽眾囉。

新春佳節在即，不如開支香檳醒醒佢。「你咁高興，係咪以後搭車可以用兩蚊？」張翁，我代你慶祝可以享受更多福利至啱啦，開香檳係敬你，我做後輩又點敢叨光呢！當然，話唔定特首唔使好耐再派福利，到時人人有分。「真係大吉利是，安仔，過年就唔好咁百厭，講番啲正能量好噃。」喝罷成口泡之香檳，不如講番故仔。嗱，大師兄剛才老作之哈里仔見番戴妃，係屬於韓劇路數，不過勝在簡單直接煽情。你知哈里仔一向火爆，從另一個宇宙得知皇室秘聞就頂唔住頸，馬上宣布脫離皇室。「吓，有乜內情搞到要割蓆呀？」銀行偉，你明知故問，其實，阿哥威廉佢都有去到另一個宇宙，母子三人講過之後，大家同意返到去就要當乜事都無發生過，唔好泄漏呢個秘密出嚟，殊不知，哈里仔衰衝動，劈炮唔撈震動全世界，威廉王子好嬲個細佬唔聽話，大家嘈交，於是畀皇宮狗仔隊收到風，即時傳出兄弟不和之消息，仲有人猜測哈里仔係唔妥佢大佬，所以要離開皇室。

「你知啦，啲乜周刊係創作中心，知少少扮代表，當大家以為兩兄弟不和，引起皇室決裂之時，一個天大的秘密就隱藏在大家耳目之外。」各位，他朝一日，哈里仔唔知去咗邊，大家千祈要從正面去諗，哈里仔唔會有事，佢都係掛住媽媽，選擇去第二個宇宙，追求更加獨立自由之生活。

張翁頂我唔順，再次溫馨提示要大吉利是，佢話再講落去，他朝有日英國宣布再次給予香港人英國居留權，大家唔好開心住，英國原來係開放戴妃嗰個宇宙畀你居留咋，咁就真係大吉利是過利是。「各位，平行宇宙有一半機會存在，呢個理論被發現咗成百年，以人類科學之進步，好大機會已經揭開真相，但係好似發現外星人一樣，被列為絕密，所以大家知啲唔知啲。」

英國科學全世界最叻，統治物理界幾百年之大師牛頓就係英國人，佢奠立了經典物理世界，教大家相信宇宙恪守萬物可確定之原則，點知有個德國科學家普朗克好搞鬼，從實驗室中得出一個驚人發現，原子內部結構其實唔係好穩定，呢個宇宙唔係你所講咁確定性。英國人當然比誰都關注這個關乎宇宙假設之大學問，或者以英國人「陰濕」成性，知都唔會話畀你知之作風使然，英國人好早從宇宙可確定理論，找出一個不確定之新領域，有理由相信英國人已經有辦法處理平行宇宙的方法。

「辰仔，你都講得幾似層層，舊年香港有好多單新聞，就係出現平行宇宙之報道，最叻係英國大台，佢哋出條片、出批相都同我哋個宇宙現實不盡相同，但又明明係好似呢件事。」偉哥，我唔知你講乜，我講緊物理學，你唔好走入你個平行宇宙，然後返出嚟亂噏。好啦，畀你窒住我條氣，唞唞，飲番杯再繼續。