李辰安 - 新春叹普洱茶｜辰来之笔

年又过年，今日年初三，为了人生更加精采，大家提早去茶楼，饮杯好茶吹吹水，不亦乐乎！
听女同事讲，即系成日都去日本，当返乡下嗰个OL，佢话日本好热闹。「讲呢啲？」大师兄似系唔多Like，至于过年前去完日本之银行伟，似乎无乜大反应，只系呻一句︰「我早知去泰国，学辰哥话斋，去Lisa姐老窦家食肆打卡。」伟哥，乜你咁好记性，过年前吹下水啫，我点知「一语成签」？「安仔，你都算讲过书，应该系一语成谶，唔好学港仔港女，成日『读破字胆』（编者按：即读别字），真系九唔搭八。」

我都无佢咁好气，大师兄你最近无去过日本或者韩国，喺边度谷到成肚气？「世侄，乜嘢叫做『读破字胆』？好多都系约定成俗，你话依家香港人求签多，还是有人识得讲解谶纬学？」我静静地食虾饺，不忘上网查一下，谶纬学源于二千几年前汉朝流行的政治预言，涉嫌有神棍为咗谋朝篡位，一早作定故仔，例如王莽建立新朝就系多得呢种宣传手法。「辰哥，呢种宣传工夫，依家都流行，我哋现代人名为认知作战。」明白，真系可以长见识。食完虾饺，咪食包包，再饮杯陈年普洱，醒晒。

「普洱系张翁私家货，系唔同啲。」听讲过千大元一斤，唔怪得咁好饮。「几十蚊両啫，都系散茶，唔系原装茶饼，胜在有啲年份，味道甘甘，又几滑口。」讲到饮茶，我平时最多系用车仔红茶茶包，都系Office班大姐采购。「你班女同事一定集体飞咗返乡下，可能会带包日本玄米茶手信畀你。」你真系又讲呢啲，不如讲Lisa姐四闺密嚟香港之盛况啦。「大哥，过年前旧闻，呢个话题讲到烂啦，何况，在座几位都系大叔或以上，点知咁多韩流新闻，不过，我睇四闺密表演好似有留力之嫌，好多卖萌扮可爱场面，实实际际之舞蹈神功少见，不过，我无去现场，你估我系城中名人咩，只不过见过网上流传之视频，系咁吹下水。」

大师兄又望住我︰「安仔，幸好在座无韩迷，你铺话法好惹火。」哦，明白，今时今日唔好讲太多韩国事，当然，日本都少啲讲，咁有乜话题？「普洱茶原本系平民饮品，一个唔觉意，上世纪八、九十年代，畀台湾人炒到变天价，一饼四八年红印，几十万元，我后生时候行过上环，茶庄摆出嚟卖系二千蚊。」张翁话，上环茶庄都有摆红印出嚟，但已列明系陈列品。「我听过人讲，红印炒到二十万元，依家唔知乜嘢行情，三年大疫，内地同胞或者无咁有实力，唔会又去炒普洱啩。」

「世侄，二十万元一饼，你时光倒流几多年？两片红印青饼，拍卖价二百万元，即一百万元一饼，疫情过后，内地经济报复式增长，我谂出年可以去到三百万元一饼。」张翁，使唔使去到咁尽？百万元饮一饼茶，有乜特色？「好简单，有底蕴，味陈化，回味再三，换言之，入口好似焦味，完全无任何清涩味，不过，半分钟多啲，甘味在你口舌中如泉涌，然后令你久久难忘。」

一般而言，红印都未必有此化境，但都开始接近，事关师傅教落，起码八十年之普洱先至有如此高境界。「我伯爷个伯爷当年系帮衬同昌号，至高级系百年宋聘……」好啦，你讲我都唔晓，我有三百万元返大湾区买豪宅等退休。好啦，今日大家食完又要开工，不如谂下放工之后去边，饮酒好唔好？