专栏│「德国金童」争夺战

讲到「德国金童」，大家可能会记得达斯拿，由史浩克04去到禾夫斯堡再到巴黎圣日耳门，但系表现同潜力就唔成正比，可以话转错会都系佢最大嘅主因。今时今日嘅新闻，都系围绕着另一位「德国金童」科利安华迪斯。

暂时有3队波争紧佢，皇马，曼城同埋拜仁，讲下呢3队波嘅处境，皇马前线人脚爆晒棚，星味都十足，如果要摆多个华迪斯，都唔知摆佢喺边好，况且皇马而家同基利安麦巴比都仲未夹得熟，虽然佢哋的确系缺少咗一个人负责派牌，但个位置上似乎唔系咁适合。

曼城其实几适合佢，一路都搵紧个奇云迪布尼接班人，似乎佢可以融入呢套体系，亦都系最舒服，可以有一个咁好嘅艾宁夏兰特同佢做配搭，绝对系梦寐以求嘅组合。不过曼城似乎有啲军心不稳，究竟嗰百几条财务违规搞唔搞得掂？再加上今季成绩麻麻地，似乎亦降低咗呢个可能性。

小弟觉得最大机会都系拜仁慕尼黑，始终德国班霸，再加上拜仁认定华迪斯系夏天第一个目标，加上适应性，始终穆斯亚拿同甘美治等都系国家队队友，即管睇下拜仁嘅出手可唔可以令到利华古逊满意。

不过转会窗往往都唔系睇咁少嘢，除咗价钱之外，都要睇球员嘅性格，球会嘅经济状况，经理人点样去Deal都系重要嘅因素，所以都系慢慢剥花生睇好戏。Willhappy