锺意做处长定局长？邓炳强百答后生仔「疑难杂症」︱Kelly Online
2024-07-11 16:32 
保安局局长邓炳强又同一班后生仔倾偈，话说邓炳强收到秘书通知，一班暑假嚟保安局实习嘅青年约佢开会，点知原来系突击访问，当中问题更加系多到答唔晒，例如问局长嘅MBTI、最辛苦嘅时刻、锺意做处长定局长等等。
邓炳强今日（11日）喺社交平台上载影片，内容系佢同一班保安局实习生嘅访问对答，开场第一问同学仔想知道局长嘅MBTI，邓炳强就话好多人觉得佢系「E人」（外向型），但佢就认为自己系「I人」（内向型），因为佢好锺意自己一个人喺屋企入面睇吓书、做吓运动。
出任保安局长之前，邓炳强系警务处处长，同学仔就问佢锺意做处长定局长多啲，邓炳强回答话「我锺意做一个做过处长嘅局长」，答案令到同学仔好无奈；同学仔之后再问局长一个好难答嘅二选一问题──锺意「警队蓝」还是「中国红」，邓炳强嘅回答仍然得体，佢话香港系一个五光十色嘅地方，除咗「警队蓝」「中国红」，佢总锺意「国安紫」添。
谈及上任两年最辛苦嘅时刻，邓炳强就话系23条啱啱开始做谘询嗰阵，有一日声沙、眼睛发炎、肩周炎、痛风一齐嚟，认为嗰一日系最辛苦。不过，23条立法系佢最有成功感嘅项目。
最新回应