杨梓菁唔会公开BB爸爸身份　疑患产前抑郁狂行楼梯催生丨独家

2024-03-23 08:00

杨梓菁（Wiyona）早前突然宣布已诞下B仔Jace，并解释非刻意隐瞒升呢做妈咪，只因意外怀孕后情绪出现问题，疑患产前抑郁，产后伤口又发炎，才于囝囝4个月大公布喜讯。对于囝囝爸爸身份，Wiyona跟圈外男友有共识将不作公开，暂未有结婚计划的她，期待囝囝未来做花仔行婚礼，她正努力操fit身形，计划全面复工。采访：杜杜摄影：朱伟彦首饰:@marylyn.style 场地:No.2

Wiyona当妈咪半年，开始适应一切以Jace为先的生活。

Wiyona跟圈外男友意外怀孕，初次陀B令她压力超大，情绪更出现问题，疑患产前抑郁，「最初唔记得有咗会撞亲，之后就太担心成日谂啲负面嘢，BB会唔会突然冇心跳？脐带绕颈？好想佢快啲出世。」她试过突发脾气大闹朋友，「朋友话『你做咩成日催BB出嚟，住耐啲好凑啲㗎』，难听过粗口，我好恶咁话『又唔系你陀，你试吓陀吖』。」为快点生B更用尽方法，「听过行楼梯有帮助，屋企隔篱有条400级楼梯，就叫阿妈陪我每晚行5、6转，但冇用，BB都要催生，较预产期迟1日出世。」

Wiyona陀BB时零孕味，「完全冇浮肿，肥胎唔肥人手脚仲好瘦，7个月先明显啲。」

Jace半岁大已重达20磅，Wiyona和妈咪已抱到有妈妈手。

操靓身形全面复工

Jace出世时重8.2磅，Wiyona本打算顺产最终都要开刀，但因她睇少这一刀，结果搞到伤口发炎，「以为坐月喺屋企就得，冇概念要真系休息，成日走去抱BB，郁动好多，伤口成日摺埋咗就发炎，有血水流出嚟，要打麻醉针洗伤口，真系痛不欲生，又上奶胸又痛，夜晚冇陪月又要4个钟喂一次奶，好想打晕自己瞓返觉好。」正因忙于照顾BB及身体，她暂未有计划跟男友结婚，「结唔结婚有冇嗰张纸其实冇分别，或者迟啲先，唔使咁急，我都期待结婚，谂过个仔做花仔嘅画面都想喊，都想有日可以实行。」她跟男友有共识不会公开其身份，「佢系专业人士，唔方便喺报纸杂志出现，唔想影响到对方。」

童年Wiyona冇Jace咁肥嘟嘟，但神态同嘴仔都好似。

Wiyona笑指Jace有点大叔feel。

Wiyona希望事业同家庭取得平衡，「keep住做嘢系keep返自信同价值，与时并进先可以教仔，唔可以成日屈喺屋企，全世界得个仔。」不过她暂时未能跟囝囝分开太耐，「BB 4个月时，有套剧要返内地拍10日，BB太细而推咗，到佢1岁应该可以飞，近嘅可以带埋佢去都得。」她已开始操返靓身形，「好耐冇做运动肌肉都流失，依家要慢慢操返fit，拍打戏都冇问题。」