林嘉欣拍戏23年自爆怪行：睇唔到自己啲戏兴奋同囡囡研究剧本有得著丨独家

2024-03-23 07:00

林嘉欣首度成为「香港国际电影节」大使，她以往曾是电影节常客，特别是初入行时要疯狂睇戏恶补不足，但做了妈咪后me time激减，现在睇戏更会受两个囡囡影响，所以近年多睇韩星作品。因为耳濡目染，14岁大女对电影都好有兴趣，嘉欣收到新剧本更会同囡囡一齐讨论角色，非常有营养的亲子活动。另外，嘉欣有一个睇自己戏的奇怪习惯，相当特别。采访：杜杜摄影：谭志光发型:Kristy Cheng 化妆:Will Wong 服饰:Miumiu、nanushka netaporter、Bvlgari、Christian Louboutin 场地:Hyatt Regency Hong Kong Tsim Sha Tsui

热爱电影的嘉欣，跟囡囡沟通的方式也跟电影有关。

嘉欣笑言因为要平等所以一口答应做大使，「10几年都冇女演员做大使，有冇搞错？！性别平等去咗边呀？！哈哈！」跟陈果导演及张献民教授出任「火岛大奖 - 新秀电影竞赛（华语）」评审，嘉欣认为3人是不同领域代表，而只需在8套作品中拣选，算很轻松，「我试过去东京做短片评审，睇咗40几部，原来45分钟都系短片，我发觉后，哗！哈哈！但系好过瘾嘅。」她做评审准则会由观众角度出发，「唔会喺度睇眼泪有冇喺两个眼睛，唔会挑剔呢啲嘢，着眼点都系导演、演员嘅选择。」

嘉欣提到两个宝贝女就笑得好开怀。

嘉欣是影展及各地颁奖礼常客。

享受跑影展煲戏

嘉欣对做评审持开放及期待态度，但唯独不能看自己作品，「作为评审同睇自己戏系好唔同，睇自己戏系睇唔落，好多干扰，我要隔好多年先可以睇返自己嘅戏，冇办法喺首映睇，会谂返现场好多嘢。」她又很享受以往跑影展的日子，「攞个pass就可以睇，康城、威尼斯、柏林呢啲影展，唔一定喺电影院睇，唔够地方播放，试过喺威尼斯好似马戏团嘅帐篷入面睇，又试过喺船上面睇，每个人有只艇仔，好大个银幕好过瘾。」以往她亦经常去「香港国际电影节」睇戏，但自从有了小朋友就减少了，「冇乜自己时间，我依家又多一瓣就系陶瓷，基本上呢4年真系好少睇电影，加上疫情，大家习惯睇唔同嘅串流平台，冇乜入场睇戏。」作为大使，她都希望想到方法，推动大家入戏院睇戏，「最锺意入戏院可以有两个钟头抽离现实，好专注冇其他干扰，电影院会唔会系被遗忘嘅场所呢？谂到呢样会觉得好伤心。」

2003年林嘉欣与郑伊健及导演黎妙雪凭《恋之风景》，获邀参加意大利威尼斯电影展。

嘉欣近年迷上做陶瓷，令她入戏院睇戏机会减少。

从来唔会睇鬼片

讲到睇戏口味，嘉欣主要看心情，但偏好暗黑类型，「如果睇咗几部都好阴沉，要睇返啲light啲。」她初入行时会规定自己每日睇戏，当做功课，「成日觉得试镜获得《男人四十》个角色，但我冇读戏剧、表演、电影，冇喺嗰个氛围下成长，咪逼自己1日要睇几部戏，法国新浪潮、二战后日本导演作品、好多美国独立电影、欧洲戏又有，我嘅training除咗走好多地方嘅戏剧工作坊，就系睇好多经典电影。」但鬼片就咪搞，「我会拍但唔会睇，15岁开始一个人住，仲要睇埋嗰啲戏会好惊，风声或者好大力闩门，我都会幻想系嗰样嘢。」

非科班出身的嘉欣，靠试镜取得机会拍摄首部电影《男人四十》。

嘉欣除了睇戏，还会参加不同戏剧工作坊汲收戏剧知识。

嘉欣虽然怕睇鬼片但照拍，出道第2部作品是《异度空间》。

幕后工作冇兴趣

当妈妈后，嘉欣笑指近年睇戏口味也受两个囡囡影响，「有时都会想引导佢哋一齐睇某部戏，几好睇喎！但系dead air冇人睬我，哈哈！佢哋拣嘅，我就会喺侧边睇杂志，佢哋就会叫我唔好揭杂志，想同我分享。」而分别14岁的Kayla及11岁Sofie已由爱看动画转到另一类，「韩国嘢多，佢哋开始锺意呢啲。」她又会跟爱睇剧本的Kayla讨论，甚至接新角色也会跟囡囡一齐研究，「小朋友冇filter，嗰啲问题好直接，有时佢哋啲疑问觉得又几好喎！我都会受佢哋影响，我每次接部戏都锺意同佢哋讨论，家姐好锺意攞我啲剧本嚟睇。」

去年嘉欣跟结婚12年的袁剑伟导演宣布离婚。

嘉欣跟前夫袁剑伟育有两女，长女Kayla及细女Sofie。

当演员多年，嘉欣终在2022年音乐剧场《塑像谱：窥看时间狭缝凝固的某一刻》，参与构思演出部份故事，但其实她对演员以外岗位兴趣不大，「上次导演甄咏蓓搵我，我先尝试，我唔会话主动去做呢样嘢。」她更笑指其他岗位太难，未必能胜任，「导演要管太多嘢，哈哈！我连啲女都唔想管咁滞，我都唔想有人管我；编剧我又唔够叻，我都系做返最擅长（演员），沉溺喺剧本嘅潜藏世界已经最舒服。」