古天后日志｜港股短线反弹 乏外资参与仍死气沉沉

12月29日，部份时间有阳光，天气较为和暖。虽然假日气氛浓厚，但道指再创新高，不过标指喺历史高位前无法再突破，纳指先升后回。2023年年结前美股靠稳，道指升53点，标指升1点，纳指跌4点。大价股开始原地踏步，资金偏向炒二三线股份，但整体动力开始减弱，留意美股喺年结过后或出现调整。

Tesla预计全年交付182万辆车，同比增37%，但低于预期200万辆，亦低于早年预期每年增长50%。毛利率下降再成为市场焦点，由于中国市场竞争加剧，大行调低明年产销预测，股价下跌3%，跌回250美元。Tesla短期看不到毛利率回升可能性，目前估值唔算平，股价喺200美元至250美元上落较为合理。留意Tesla系美股指标之一，佢唔行嘅话，美股亦行唔郁。

多只指数重磅股份疯狂插水

临近年结，A股喺周三见有国家队入场买内银股，噚日A股就出现暴力式反弹，3大指数急升1.38%至3.85%。喺年关将至，唔排除阿爷喺2月过年前迎来一次大放水，问题系阿爷再放水，仲有冇人肯借，或者负担得起再借，一如过去两年玩法，今年地方专项债已有2万亿项目获提前审批，即系到咗1月1日开始地方政府就可以到银行提钱。为咗迎合整个放水计划，11月中中央更特意增发行1万亿特别债，据悉已全数出售，呢1万亿特别款项，已存入各地方政府户口。此外，上周四银行为配合阿爷，特意下调0.1%利率，A股出现反弹亦合情合理。

至于港股，经过12月多只大价股大洗太平地，包括阿里（9988）、美团（3690）、京东（9618）、腾讯（700）、网易（9999）、药明生物（2269）、港交所（388）等多只指数重磅股份疯狂插水，好友信心彻底崩溃，连最后韭菜都被割。结果喺圣诞节假后就出现反弹，不过到今日恒指仍未企稳万七水平，港股继续有波幅，冇升幅嘅困局，愈趋A股化，对于外资基金嚟讲，呢啲阿爷说了算嘅市场，都系避之则吉。缺乏外资参与嘅港股，变得死气沉沉，即使短线有反弹，亦唔值得去追货，指数炒上炒落还可以，中长线持有港股，只怕内地政策朝夕令改，坐咗货都好难安心睡眠。

---
《星岛申诉王》推出全新项目「区区有申诉」，并增设「我要赞佢」栏目，现诚邀市民投稿赞扬身边好人好事，共建更有爱社区。立即「我要赞佢」︰ https://bit.ly/3uJ3yyF

想睇更多精彩内容，请立即浏览「区区有申诉」活动专页，https://bit.ly/41hgS9E

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ