古天后日志｜苹果iPhone15惊喜欠奉 港股万八唔上唔落赶客格局

9月13日，大致多云，有几阵骤雨，局部地区雨势有时颇大及有雷暴。隔晚美股总见下跌，主要系甲骨文绩后股价急跌逾一成，加上苹果公司发布会后，股价果然系高开低走，拖累大市气氛，三大指数下跌。道指跌17点；标指跌25点；纳指更跌144点。虽然暂时美股沽压唔算大，仍然系高位徘徊，睇嚟今个月议息之前，都唔会有太大变化。

苹果（美：AAPL）iPhone15无乜惊喜，价钱亦未有预期咁贵，但股价又喺发布会后跌，皆因华为嘅Mate60 Pro大卖，喺内地排美爱国情绪下，iPhone在华销售未必受影响，明年上半年较难再有增长，以目前苹果公司30倍PE嚟讲，又真系贵咗啲，股价唔落返170美元楼下，吸引力有限。

相关文章：iPhone 15｜华尔街现「沽空苹果」声音 发布会后股价再跌1.7% 华为Mate 60 Pro成天敌？

美股炒经济软著陆，并憧憬经济明年见底回升，油价回升至89美元，短期大有机会上试95美元至100美元，油股借势炒上，加上医药股开始转强，反而科技股转弱，留意资金会否由新经济股流入旧经济股。美股后市升跌仲要睇住10年债息走势，住6月财政部大手发行新债后，美债市场喺短短3个月内便吸走7,500亿美元资金。美国未来12个月内将有31%短债到期，涉及7.6万亿美元，喺持续高息环境下，白宫喺未来两年要开始捱贵息借钱，断估美国无咁笨自己搬大石揼自己脚趾，要睇睇联储局识唔识做。不过明年系大选年，相信美国赤字会再度被两党摆上枱。小心喺财政预算案上两党会再次「玩嘢」，呢个系其后美股可能出现大震荡嘅一只灰天鹅。

港股成交持续低迷

人民币离岸价回升至7.30水平，中概股靠稳，但高追资金有限，恒指ADR回升52点，收于18,078点。港股周二先低后高，再跌70点回试18,000点水平，但成交缩减至841亿，买卖两闲局面继续。港股成交持续低迷，空军一直唔放过重磅股，沽空数量持续高企，散户亦无心恋战，形成一个低成交阴乾式慢跌格局。除非有新资金入场，至少要有资金入场同空军抗衡，至少空军唔可以太过放肆。但短期唔见外资会返转头，而北水又只系弹出弹入，基本无意愿坐货。散户被割韭菜无数次，已唔想再入场作无谓牺牲，个个得个睇字，港股一潭死水，继续系死鱼一条，暂时喺万八边上落，完全系赶客格局。

---
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ