独家丨「做工佬」Ritchie自资拍新歌MV花絮率先睇《造星V》遗珠未获ViuTV倾签约唔心急

2023-08-31 06:30

《全民造星V》终极遗珠，来自马来西亚，26岁的「做工佬」Ritchie(梁玮城)在20强输畀Taco以3比2出局，观众在官方Page海啸式洗版戥佢唔抵。唱到歌又识创作，三个月搞两次Fans Meeting都供不应求，TG Fans Group人数仅次冠军Lyman，多人过亚季军，仲因为锺意玩Pokémon GO，令一班工友(Fans昵称)日玩夜又玩。有超强观众缘的Ritchie坦言ViuTV冇联络倾合约，想留港发展的他唔心急，努力作新歌兼自资在港拍埋MV，冇公司搵咪自己做住嘢先，醒目吖。采访:廖思慧、杜杜

《Summer Live》当晚要著返数月前的比赛服装，瘦咗两个码的Ritchie笑言，「彩排走出嚟，条裤一直甩，要一直拉住个裤头。」

Ritchie一埋位自动波摆心心甫士。

送畀工友。

都系送畀工友。

做工佬的TG Fans Group

Lyman 的TG Fans Group

亨仔的TG Fans Group

KC的TG Fans Group

成为《造星V Summer Live 》网上票选冠军，可以有Solo演出的Ritchie希望大马香港两边走，透露已跟当地审计公司老板倾过，「点样可以Work from Hong Kong ?老板好支持我做呢件事，我哋都谂紧办法。」

《造星V Summer Live 》网上票选三甲。

Ritchie 在《造星V Summer Live 》唱出18岁时创作的《I Can't Tell》。

问到跟ViuTV倾合约倾成点?有点不知所措的他，尴尬笑言，「其实系冇嘅」，其它公司呢?「都冇」做工佬拧住头回答。不过佢好识谂，「冇公司可以做自己嘢先，好似MC，参加《造星II》后一段时间先签公司。」Ritchie表示会创作更多作品，特别会写多啲广东歌，「畀公司知道我好有诚意留喺香港，写多啲作品，多人锺意嘅，我觉得自然会有公司搵我。」

自己倾Job有难度
讲到创作，Ritchie早已跟《造星V》战友，来自美国的黄哲齐作R&B曲风的新歌叫《鸡蛋仔格仔饼》，在《Summer Live 》翌日亦在港拍了MV。「因为我哋两个都系海外参赛者，想留低一啲关于香港嘅作品，所以一齐喺香港拍MV。」经两位本地摄影师介绍，MV分别在旺角及香港最红打卡景点彩虹邨拍摄，朝10晚9，拍足11个钟。对于MV制作，Ritchie称参加《造星V》识咗好多摄影师、化妆及发型师朋友，仲有店铺赞助服装，「全部有人工嘅，我跟阿哲畀钱，budget 4位数。」

Ritchie称拍MV如香港一日游，去咗好多冇去过嘅地方，而MV暂定9月尾见街。

Ritchie睇过韩国女团 loona 1/3 的《love & live》 MV，所以好想去彩虹邨睇吓兼同阿哲拍埋MV。

坐中间的是MV 女主角Christy 。

在旺角拍摄MV时好多途人围观，Ritchie坦言有啲怕丑。

《Summer Live 》翌日拍MV，Ritchie挂住同战友吹水，浅睡一个钟就开工。

拍摄MV当日天气唔稳定，去到第一个景点就落雨。

好彩落咗一阵雨就全日好天。

Ritchie并非第一次拍MV，4年前在大马已有自己第一个自创曲《Only You》的MV。

浪漫得嚟几好笑。

收到MV片段要补问，叫Ritchie录音就可以，估唔到佢逐条用文字答，令记者悭回大量时间，做工佬世一。

Ritchie坦言《造星V》完结后自己接洽工作，要做工又要兼顾经理人事务，由跳舞唔叻到跟Lyman及Adams同组斗跳都应付自如，Ritchie的毅力唔使多讲，他称有困难，但还好。「ViuTV仲会畀啲提议我，有啲工作会问佢哋要点倾，开咩条件等等。」

有心理准备两边走
9月10日将再办三个月内的第二个Fans Meeting，原因是首次FM加《 Summer Live》当晚未能跟Fans有更多互动，所以宠粉的他希望借今次多跟粉丝倾偈，他亦乐见战友陆续开FM。另外，9月9日他亦会出席海洋公园举办的TrendyToo SPLASH活动，「如果有好嘅机会、舞台、活动，我都一定会把握，亦做好经常两边走嘅心理准备。」