独家丨《造星V》希晋拜拜容貌焦虑戒浓妆被插符碌入10强爆上第4名超励志

2023-08-21 06:00

《全民造星V》的王希晋在决赛前接受《头条日报》访问，对被指符碌入10强未有被打沉，更叫大家等睇佢表演，然后决赛日获评判Edward点名大赞有进步，埋单拎第四，足够令Haters收声。刚过24岁生日，在上周日的《全民造星V Summer Live 》场外获Fans预祝牛一的希晋，坦言有容貌焦虑所以个妆越化越深，讲明会顺应民意的他，在上周五（18日）举行的人生首个Fans Meet加生日P拜拜浓妆，请埋《造星V》老友Anson Wong做嘉宾，结他伴奏唱出多首歌曲，又打开心扉玩分享，饲养员（Fans昵称)表示开心又满足，𠱁粉能力极强。采访:廖思慧、杜杜

除下唇环兼染回黑发，希晋成个样乖晒，据知唇环个窿都埋咗口。

希晋称同ViuTV倾紧合作，希望有一个满意offer，详请就唔方便讲嘞。

《Summer Live 》中希晋突然感怀喊出嚟。

希晋完成《Summer Live 》后在应援区打咭。

《Summer Live 》完场，Fans同八月之星希晋及KC预祝生日。

希晋在上周五（18日）举行人生首个Fans Meet加生日P。

告别浓妆的希晋即刻变咗隔离屋啲哥哥。

两人唱出多首歌，包括《穷小子》及《厌恶物图鉴》等。

希晋在Fans Meet中，同Anson Wong唱咗两人新歌《I’m going nowhere》。之前问到属于咩曲风？希晋称是淡淡忧伤嘅情歌。

希晋话冇谂过Fans Meet有咁多人参加，留眼湿湿Emoji表示好感动。

在《Summer Live 》开Show前搵希晋倾两句，他正跟ViuTV倾合约中，未来希望Solo同夹Band同步并进，讲到亨仔想组Band，预想成员包括佢，希晋秒答，「当然好啦，同佢夹得好开心。」再问系咪唔锺意入男团?Keep住笑笑口的他强调锺意跳舞，「只系我好大汗，跳完舞出晒汗成日要抹汗。」

《Summer Live 》中希晋有多个表演项目。

好锺意夹Band的希晋提到Edward有私下畀意见，提佢可以唱得再从容啲。

一直有创作音乐的希晋，以艺名HEi-Z推出过EP《 Poizon 777》。

有问必答老实人
提到Kakit（邓家杰）识玩Social Media所以接好多广告，希晋戥对方开心，更老实透露自己冇广告商搵，「如果有嘅话，当然好啦。」提议佢努力将社交媒体发扬光大，他说，「会呀，陆续拍啲唱歌cover，同KC拍啲跳舞IG reels希望多啲人认识我。」提醒他跳舞会身水身汗喎?希晋大笑回应，「reels好短㗎咋，30秒，唔会身水身汗。」

Kakit为主题乐园拍广告。

希晋同KC会拍多啲跳舞IG reels希望多啲人认识。

问到有冇其它公司接触佢?希晋继续老实，「冇喎，冇其它公司搵我都OK，完咗节目对呢间公司有啲留恋，可以成班兄弟一齐。」再问《Summer Live 》有否酬劳，希晋拧拧头，「但有少少车马费。」有网民觉得佢个妆太浓，难得希晋继续坦白，「化妆浓系我要求，因为我有容貌焦虑，想只眼深邃啲，大啲，轮廓出啲，所以加多几笔，会浓咗啲。」老实仔坦言会顺应民意，因为有时上载素颜照或淡妆照，Fans特别锺意，所以下次演出会淡妆啲。