古天后日志｜通关消息刺激港股二万关结算

12月28日，天晴，早上清凉，天气乾燥。隔晚美股假期后表现偏软，虽然道指仍录得37点升幅，但标指高开低走，跌15点；纳指跌幅更超过1%，跌144点。唔少人仲放紧假，过两日又新年，成交薄弱，喺缺乏买盘支持下，自然易跌难升。标指已失守3900大关，好友唯有退守3800，目前美股去向仍然要睇息口何去何从。美国联储局持续放鹰，10年期债息回升至3.85%，之前10年债息跌穿3.5%，市场预期未来减息1%似乎过份乐观。

债息回升科技股自然走弱，而喺美股呢一波反弹行情以嚟，科技股一直跑输，低息借钱疯狂扩大版图呢枝歌仔喺息口回升下无得再唱，科技股难再以低成本借贷烧钱扩版图，反而要担心一直借贷渡日嘅高杠杆科技，能够捱得过，抑或破产收场。Tesla系较明显嘅派发例子，股价喺大量沽空仓位累积下，股价持续下跌，再咁跌法，恐怕连三位数都难保。除咗Tesla跌到一仆一碌，就连苹果公司呢间坐拥大量现金嘅实力派，一样捱沽，股价已逼近52周低位128.6美元，就连苹果公司咁稳阵，持大量现金嘅科技股都缺乏买盘支持，可见科技股弱得紧要。

虽然美股科技股弱过药煲，但中概股喺内地落实通关消息后，表现强硬，只不过中概股升势唔够全面，Tesla跌跌不休，电车股三傻跟跌，其他中概股升势唔算显著，只有出行股表现较强。A股并未有圣诞假期，过去两日内地股市上升，只系升势唔算强劲之馀，成交亦唔算畅旺，深沪两市成交未及万亿，可见入场资金唔算积极。

至于港股今日放完圣诞节假返嚟，明日就期指结算，估计借通关消息高开，大户亦可顺势喺高位转仓。内地喺疫情大爆发之际决定通关，印度跟日本已先后调整对中港澳旅客入境措施，喺疫情大爆发之际通关，是福是祸难料，幸而新冠病毒经多次变种后，杀伤力已大不如前，重症或死亡数字只要唔严重，内地大规模感染后能逐步复常，唔再坚持清零封关封城，长远都系好事。目前要睇阿爷会否再推任何推动经济措施，炒完通关消息后，中港两地股市要再推高，就要睇有冇刺激经济措施出台，升势方可得延续。值得留意系年结推高进行window dressing，1月基金需进行资产配置，喺二万水平进行配置嘅话，又会否真系高咗啲，大户真系有心再推高大市? 抑或年结之后回复平静，应该要过埋呢个星期先有答案。