独家丨肥妈退休三年炒燶股票输咗5000万醒觉个天要佢做嘢「复出」开红馆Show

2022-12-12 07:00

2016年肥妈(Maria Cordero)举行《友谊长存30周年香港演唱会》正式告别红馆，休息6年，肥妈将于下月27及28日（初六、初七）重返红馆开骚。今时今日的肥妈唔再轻易讲「告别」两字，她自爆退休3年期间，炒燶股票输咗近5000万，加上老公又患上重病承担巨额医药费，她才醒觉：「原来个天系要你做嘢，做乜话告别唔做啫！」采访：方骞平摄影：孔子场地：Villa 26

肥妈下月重返红馆开演唱会，以后唔敢轻易讲退休。

黑妹姐系肥妈个唱嘉宾，大爆肥妈好多人追。

6年前肥妈告别红馆演唱会，请咗Big Four做表演嘉宾。

肥妈下月举行两场《面对面演唱会》除咗搵嚟老、中、青三代嘉宾，包括「黑妹姐」李丽霞、马浚伟及《声梦2》亚军黄洛妍（Janees）外，肥妈仲会「预埋」已故老公Rick：「以前每次我做演唱会，佢都会喺台上打高鼓，到时个鼓手会打我老公套鼓，我会凭歌寄意唱《凭著爱》，希望唔好眼湿湿啦。」

肥妈感恩上天畀健康佢工作。

肥妈明白到凡事顺其自然最好。

目前肥妈过住平稳生活。

肥妈喺初六、初七开骚，配合农历新年，保证观众会笑住走。

老公生前系肥妈铁粉。

肥妈及黑妹姐经常孖住演出。

近七十岁仲大把人追

由于在外地嘅乖孙正值考试，所以唔会返港睇骚：「但佢哋约好2月返嚟同我做70大寿，哈！我45岁后唔记得年龄，都唔想去知，我又唱得、又跳得、又玩得好后生啫，或者仲有好多人媾我呢？」在旁好姊妹黑妹姐证实肥妈有人追，中国人外国人都有，但肥妈耍手拧头：「我唔要呀！呢个世界有比较嘛，冇人好得过我老公，我经已攞咗个最好，咁其他要嚟做乜？𠵱家我不知几开心，身边大把伴，周三及周六做直播，又要做《中年好声音》及帮爱犬冲凉，日内要录一首黄家驹生前为我写嘅歌，分别会唱英文及广东话版，忙到将部份工作pass畀黑妹。」

孙女明年2月回港为肥妈庆祝70大寿。

家中爱犬带畀肥妈欢乐及寄托。

老公走咗两年，肥妈依然感觉到对方常伴左右。

由八蚊跌到得八个仙

69岁的肥妈唔敢再讲退休，她无奈爆料：「当日揸住4、5千万现金，咪觉得应该告别罗，讲完之后投资失利冇晒，我老公仲患上重病，前年走埋。」原来当初肥妈因为识人，谂住唔会衰，入咗5千万关于电灯嘅香港科技股：「朋友仲保证话『衰咗咪畀返你罗！』点知佢都破咗产，点叫人赔？𠵱家嗰只股票都停埋牌。」至今她仍然好记得惊心动魄的一日：「嗰日喺TVB煮紧餸(录影)，睇住银行股价由8蚊大跌至8毫子，过咗几日跌到8个仙，结果输剩200万，好彩系正经人家唔系炒孖展，唉！过咗去就过去，唔系你就唔系你，冇得倾。」「重创」后肥妈做人反而变得更积极：「唔紧要嘅，个天都畀健康我做嘢啫，虽然跑唔返几千万条数，但都OK跑返少少嘅，至少喺世界各地嘅物业及铺位全部已供满，𠵱家可以过住平稳生活，赚吓钱做吓善事。」

退休3年期间，肥妈两公婆周游列国好sweet。

肥妈入厨房就开心，𠵱家每周做两日烹饪直播，其中一日孖住黑妹一齐做。

老公病入膏肓时，肥妈做Live喊住唱《凭著爱》。

老公身患重病时仍力撑肥妈做烹饪直播，走前叮嘱她一定要做落去。

将海外物业分畀啲孙

肥妈又透露已写晒平安纸分身家，海外物业会分晒畀啲孙，早生嘅早享受：「我老嘞，唔使要喇，如果佢哋唔锺意，咪将啲物业捐咗出去罗，关我鬼事咩，我叫做有嘢留畀佢哋。」肥妈指当日低价买楼，因为两老打算周游列国探吓儿孙，但计划赶不上变化，当两公婆供完晒楼，老公就先行一步。老伴离世她也不再置业：「不过，庆幸嗰几年唔使做嘢，可以日夜陪到佢周围去打波及见晒啲孙，谂返转头都算冇遗憾。」