古天后日志｜蓝筹新贵有货要识落车

8月22日，大致天晴，局部地区有骤雨，日间天气酷热。上周五美股三大指数下跌，10年期债息重上2.96%，科技股受压，加上加密资币显著下跌，之前市场过度乐观情绪有所收敛，市场观望本周央行年会Jackson Hole，鲍爷会否放鹰。

上星期美股高位徘徊，古天后都讲过，重磅一线股上升动力减退，资金开始转炒二三四线股，散户追捧Meme股，通常炒到垃圾股，出现劣常驱逐良币嘅情况，美股升势好大几会已接近尾声。而最近美国又话出咗个少年股神，廿岁仔靠炒Meme股，一个月内劲赢超过1亿美元。

一听见有乜乜少年股神，师奶股神，民间股神出现，就系反映嗰个市场炒股气氛炽热，就算未至于全民皆股，都系全部股民情绪极度高涨，一旦市场气氛逆转，咁多散户争相逃走，好似出现人踩人嘅惨剧。

内地股市渐入佳景

美国讲紧有机会联储局再放鹰，相反内地呢边一直削削地加大放水力度，上周一年期MLF中标利率下降10点子至2.75%，市场预期今日公布嘅8月LPR可能下调10点子，5年期LPR更可能下调15点子。喺阿爷持续放水下，内地股市渐入佳景，沪深两地股市维持过万亿成交一日，资金充裕下，A股喺现水平稍作整固，有机会继续向上。

至于港股继续一潭死水，上周每日成交维持800亿左右，外围升跌都好似唔关港股事，港股继续喺20000水平上下几百点上落，完全无乜睇头，讲到尾缺水问题一日唔解决，港股都系死到直。虽然踏入业绩期，但要炒业绩亦唔容易，有息派嘅股份表现好少少，好似药明生物(02269)就算业绩好过预期，但无息派股价弹一弹又系畀人质返落去。

上周五恒指服务公司进行季检，恒指加入四股，包括中国神华(01088)、周大福(01929)、翰森制药(03692)及百度(09888)，恒指成份股增至73只，今年要达标加到80只恒指成份股无乜难度。不过过去两年，但凡被钦点加入蓝筹嘅股份，股价都无好下场，见顶后回落，更有部份股份喺染蓝后唔见一半，难怪口痕友话一染蓝，价更残。如果手上有呢几只股份，好趁今日染蓝消息刺激好消息出货。

古天后

(徐狄怡，证监会持牌人)