古天后日志｜港股21000水平穿梭暂未见突破

6月21日，天气炎热，部份时间有阳光，局部地区有骤雨，嚟紧几日更加热。隔晚美股休市，欧洲股市普遍向上，为对抗通胀，欧央行决定继续加息，但同时又担心经济衰退，以及欧债喺加息下出现危机，欧央行考虑一边加息，一边QE是否可行。道指期货回升，新加坡黑期高水，预期今日港股将略为高开。

喺通胀高企下，市场已倾向相信，美联储局喺6月加息0.75厘下，7月再加息0.75厘机会愈嚟愈大，9月再加息0.75厘嘅机会率亦升至四成以上，喺年底前息联邦利率应见3厘或以上。今晚鲍爷将出席听证会前，道指期货向上，似乎市场正打赌鲍爷未必再放鹰。

虽然美股摇摇欲坠，但港股近日表现偏强，即使成交未见显著上升配合升势，港股亦能咬住21000水平企硬，睇嚟6月都系好友占上风。港股得以企硬，主要靠A股强劲表现。基金入市态度积极，私募基金嘅仓位已高达七成，不过散户入市并唔积极，主要系散户资金喺3月抄底反弹时，唔少散户追货资金又被锁死，只系阿爷喺5月开始放水，令市场资金较为充裕，暂时A股仍可维持强势。

资金丧炒细价股并好现象

至于港股仍然喺21000水平穿梭，连日嚟出现日升日跌嘅反覆状态，即使市场唔少预测指港股有能力上试22000至22500水平，碍于美股嘅表现，港股都未能重返4月中高位。而大市成交亦未见配合，重磅股升至现水平亦出现疲态，资金开始流去细价股寻找机会。

资金丧炒细价股并非一个好嘅现象，好似残都飞起嘅教育股，过去个几星期录得惊人升幅，不过市场丧炒之际，大户一于少理，你有你炒高，我有我松绑走人。新东方在线(01797)喺短短个几星期暴升十倍，其主要股东之一嘅腾讯(00700)趁机套现走人，高位几乎尽沽手上股份，在手上持股从超过9%降至不足2%，难得喺熊市之中搵到一道逃生门，腾讯都要讲声「走先喇，系咁先喇」。睇返之前北水炒到出烟嘅石油股、煤炭股及基建股等等，近日明显走弱，唔排除本轮反弹已到尾升。而几件重磅科技股，喺现水平亦停滞不前，就算好友呢个月几把炮，要将大市推上22000又谈何容易。

古天后

(徐狄怡，证监会持牌人)