古天后日志｜大市升抵二万二水平 反见北水沽出重磅股

6月9日，多云，间中有骤雨，有时雨势颇大，并有狂风雷暴。隔晚美股反覆偏软，三大指数下跌，纳指未能企稳12200水平，而标指则受制于4200，暂时喺高位反覆，继续日升日跌状况。虽然10年期债息高企于3厘之上，美国联储局亦开始缩表，但市场流动性暂时未见受影响，只系到现水平再愿意入场追货嘅资金有限，反而资金倾等待回调时候入市。

星期五晚美国将会公布最近嘅CPI数据，预咗呢个数字喺通胀高企下，维持高位，只系市场憧憬通胀已接近见顶，所以唔少预测都认为未来联储局加息唔会太过积极。不过高通胀唔喺一时三刻回落，只系市场需求下滑，有助舒缓通胀压力，但就零售业嚟讲，需求急降令库存急升，零售业不得不降价求售，自然令毛利受压，从而影响到盈利表现。而美股能否支撑得住，企业盈利表现系一个重要因素，一旦企业盈利预测有所下降，美股自然站唔住脚。

小心中概股除时掉头

美股摇摇欲坠嘅走势，直接影响到全球股市表现，呢个亦系古天后对港股后市持续向上，甚至步出熊市呢啲讲法有所怀疑嘅原因。不过中概股近日反弹升势之强劲，确系令到市场哗然。而中概股咁嘅走势，亦正好说明炒作嘅资金，似乎唔系外资，而系一向行事较为大胆嘅中资为主。而睇返中概股嘅升势，由一线股份开展，升势已蔓延至三四线股份，一啲基本因素较差嘅中概股亦炒上，小心中概股除时掉头，尤其喺超买已出现嘅情况下，中概股现水平再追货值博率好有限。

至于港股呢边噚日成交增至1840亿元下再升至22000水平，成交增加配合升势系好事，但唔好忘记重磅股嘅股价升咗，成交额亦好自然会上升。而恒指亦已逼近100日线，能否升穿企稳，系大市能否更上一层楼嘅关键。留意呢两日升市，北水参与唔算积极，噚日更见美团(03690)更腾讯(00700)纪得北水净流出。连一向积极进取嘅北水，亦开始喺呢啲水平食糊套现。

古天后

(徐狄怡，证监会持牌人)