关心妍重提「攞错奖」被批评 5岁囡囡睇片心痛爆喊

2022-05-22 12:45

出道20年的关心妍（Jade）近日接受港台《旧日的足迹》访问，她表示自己用了第一个10年去追梦，而之后的10年人生就更精采：「人生应早啲经历甜酸苦辣，我无悔！当中系好刺激、好难顶、好瘀，但呢啲正正系人生，我哋只会活一次。依家我40几岁开始倒数，唔可以再挥霍光阴。」

20年来，关心妍要感谢三个人，包括关妈妈、罗杰承和丈夫：「妈妈喺我面临失业时冇收我家用，又畀我好大支持。第二个要多谢我第一位老板罗杰承，冇佢就冇关心妍。第三位当然系我老公。（是否三亿老公？）当然唔系，信一半都死！佢改变咗我好多对于婚姻同爱嘅睇法。我以前冇父爱，唔明乜嘢叫被爱。我好强，因为冇人系身边呵护我。佢嘅无微不至令我变得小鸟依人，我先知道原来自己系女人！」

关心妍失业时，感激妈妈唔收家用。

二人拍拖2年几，老公就向佢求婚。

曾为「关家姐事件」想报警

提起「攞错奖」一事，外间都记得关心妍多年前在一次音乐颁奖礼上的尴尬场面。她谓最近女儿练习跳舞时看见当时的录影片段，哭得很凄凉，问为何其他人要批评妈妈：「我安慰佢要坚强，坚强先至可以面对逆境，所以我而家唱歌就系要唱一啲有意思嘅歌，并唔系为咗攞奖。我日后会唔会出席颁奖礼就留畀公司去决定，至于我自己暂时就未有呢个谂法。」

关心妍人生中的另一挫折，莫如「关家姐事件」，令当时正走红的她人气下跌。重提此事，她感到相当无奈：「当年人气急升，锺意你嘅大有人在，但系唔锺意你嘅人亦多，如果把关唔好，会好危险！（当年）突然有一篇潮文话我去名店买衫，要人家封铺，店员唔肯，结果被炒。发文嘅人系店员嘅弟妹，直指我人格差。其实当时我忙到不得了，差啲连瞓觉嘅时间都冇，点会有可能去行名店？我嘅衫全部由设计师准备，而家我做咗人太太就有可能去 Shopping。网上流传咗十几年，到而家边个系家姐、边个系细佬妹、边间铺头都冇人出嚟认......我澄清过，但我喺锋尖上面。而家就话可以喺网上fight back，但以前就系信不信由你。」她透露当年曾想过报警，但最后决定不再纠缠，想不到文章每年都会出现，她指「我有信仰，上帝知道我冇做过」。

当年关心妍喺台上「攞错奖」，关菊英帮手解围。

咁尴尬嘅场面，关心妍话囡囡睇片都喊得好凄凉，唔开心妈咪被人批评。

5岁囡囡将做红馆演唱会嘉宾

关心妍即将举行第三次个人演唱会，五岁女儿心心主动提出上台客串：「我拣咗合唱《Smile》，系我怀住佢时送畀佢嘅歌曲。好搞笑，佢要求唱完后打个侧手翻，因为佢立志做柔软体操运动员，好锺意打关斗.....我嘅服装设计师陈华国为我准备咗六套衫，应该好有舞台效果。大会又为女女准备咗一件全部钉哂石嘅晚装，可能件衫仲靓过我！哈！」