独家丨关心妍力邀关菊英做嘉宾欣宜MIRROR夹攻唔担心红馆票房

2022-05-04 07:00

入行20年的关心妍（Jade）回顾「人生大事」，除咗结婚生女，一定要数到2009年喺TVB《2008年度十大劲歌金曲颁奖典礼》中攞错关菊英奖项事件，将于6月4日及5日在红馆举行《“约”20周年演唱会》的Jade望能徇众要求请得菊姐出山做表演嘉宾：「唔使重提攞错事件都够爆，我觉得系人生中嘅烙印！」采访：方骞平摄影：沈健程化妆：Cyrus Lee 发型：Adrian Au @ Salon Chemistry 服装：Marella 形象：HY @V Chapter 场地：Pier 1929

关心妍和歌迷都成长咗，希望喺个唱上开心聚旧。

疫情缓和，关心妍希望同歌迷见吓面。

关心妍出道4年即登上红馆开处女个唱，而第2次嘅红馆show喺10年前，今次系第3次，亦系首次尝试做四面台，所以心情都特别兴奋：「做一个演唱会要好努力同埋好坚持，做完今次之后都唔知几时可以再成就到一个个唱，尤其四面台演唱会系香港独有嘅嘢，作为一个唱咗20年歌嘅香港歌手，置身其中经已了咗心愿，人生真系冇遗憾。」

虽然个唱筹备时间仓促，但关心妍谂起开到四面台都好兴奋。

关心妍出道第2年经已举行迷你音乐会，感动到喊。

18年前首次红馆个唱以性感tube top示人。

对上一次个唱系7年多前喺九展开show。

人行最遗憾事件

讲到入行后最遗憾嘅事，唔使讲都估到系「攞错奖事件」，Jade仍带点耿耿于怀说：「呢个唔止系笑料，更加系烙印！但按观众民意，今次演唱会最想睇到菊姐，其次先到我囡囡心心，惟有顺应民意。其实过时过节，我都会传短讯畀菊姐，不过，暂时未搵到佢，听闻佢唔喺香港，𠵱家努力联络中。至于6岁心心未知会唔会上台唱歌，佢最想系表演我做唔到，而佢做到似模似样嘅翻筋斗，但我要佢向爸爸申请，未知舞台能否配合所以唔敢答应佢住。而老公杨长智（Jonas）会负责迎宾及票务，因为得一个月筹备，时间紧迫要分工合作。」

关心妍攞错奖事件被笑足13年。

关心妍囡囡最想喺红馆舞台表演强项翻筋斗。

关心妍最开心系建立咗个幸福家庭。

唔蚀本已经好好

Jade感慨20年时间飞逝，疫情下所有嘢都唔同晒：「今次开两场唔蚀本已经好好，既然投资者对我有信心，唔介意场馆入座率限一半，所以决定唔好理咁多，做啦！20周年系个里程碑，趁住疫情缓和可以出到街，希望大家开开心心gathering。」提到被张敬轩、郑欣宜、冯允谦、人气男团MIRROR等夹住开Show，问到可会担心票房问题？Jade坦言事前真系唔知系咁：「因为件事嚟得太急，唔要就冇期，20周年就冇得开…咁前后有晒人都几热闹呀，希望啲人出返嚟睇show会有返啲信心。」而她为配合演唱会做新歌《约》送畀歌迷，歌曲会探讨人生，疫情下可以约会已变成奢侈品，大家要好好珍惜。