古天后日志｜买卖两闲港股偏向淡静

5月13日，密云，间中有大雨及狂风雷暴。隔晚美股表现反覆，三大指数个别发展，道指跟标指分别跌103点及5点，前者已连跌六个交易日，纳指则倒升6点收市。4月份美国生产物价指数(PPI)按年升11%，高过预期的升10.7%，撇除能源和食品的核心PPI按年涨幅8.8%，略低过市场预期的8.9%。PPI高企，加上虚币市场跌到一仆一碌，早段令美股插水，不过其后10年债息回落至2.86厘，重返3厘楼下，多得鲍爷重申6月及7月加息0.5%，即进一步确定排除加息0.75厘嘅讲法，债息短期见顶，美股市有望喘定。

资金蒸发难大量流入股市

不过，美股喘定回稳后能否急速反弹，呢方面古天后睇法相对保守，毕竟虚币一轮爆煲后，即使有反弹，但市场资金已蒸发，虚币暂时跌定咗，只系减低咗资金喺股市沽货套现嘅压力，唔代表会有大量资金流入股市，支持美股大幅反弹。

至于A股跟港股落就唔多肯落，但升呢又欠缺成交配合，动力有限，加上今日周末前夕，可能又陷入买卖两闲局面，窄幅波动，闷局一场。内地快将公布MLF利率，喺人民币走弱下，短线基本无乜减息空间。加上经过两度降准后，暂时市场资金唔算紧绌，暂时无必要再向市场放水。既然市场短期唔见再有新资金流入下，港股淡静嘅事实已难扭转，北水集中买住几只重磅科技股，其他股份表现乏善可陈。

虽然近日间中有个别三四线股仔落镬炒作，但从来呢啲股仔纯由庄家操控，散户入场通常都系赢完粒糖之后，就输返间厂。即使坊间有唔少「专家」积极推介，古天后唔敢妄言系夹埋庄家散货，但眼见呢类股仔，连升多日后，但有足够散户入场参与，就出现一日急跌五六七八成惨剧，散户被割韭菜，成为庄家点心几乎系无可改变嘅事实。既然如此，又何必贪圆呢啲蝇头小利，倒不如靠边站，食下花生算数，古天后都系坚持唔会沾手庄家股。

古天后

(徐狄怡，证监会持牌人)