古天后日志｜港股整固需时 暂仍未宜进取

5月11日，多云，有骤雨及狂风雷暴，初时雨势有时颇大。美股隔晚个别发展，美股经过几日狠狠地插水向下，早段见三大指数反弹，可惜道指早段曾升逾500点后掉头向下，全日仍要跌84点；至于标指跟纳指则分别反弹9点及114点。虽然鲍爷喺议息会议表示排除嚟紧加息0.75厘，不过局内其他官员则表示，唔会永远排除加息0.75厘嘅选项，如果下半年通胀情况无改善，当局都系要加快行动。有官员警告美国经济可能再次出现季度负增长，失业率恐会提高，估计通胀不会在2022年底或2023年回落到2%。

睇返美股嘅反弹力度唔算强劲，最先破底嘅纳指反弹叫有多少少力水，但道指跟标指反弹力度就比较弱，反映美股喺反弹期间嘅承接力只系一般。留意今晚将公布4月份CPI，喺油价高企下，呢个数据唔会好睇得去边，一旦数据表覝麻麻，今晚美股甚难延续反弹。

暂时A股只能转为防守

至于中港股市，上证指数似乎要力守3000点，噚日港股亦系靠A股向上而低开高走，只系深沪两地股市成交一直徘徊万亿之下，反映入市资金有限，A股能靠稳都只系沽盘暂时撤退，话晒阿爷开到口叫基金投资眼光要长远啲，唔好咁短视，变相叫基金咪乱咁沽货，A股沽压自然有所退减。但唔沽货亦唔等于会买货，始终内地缺水问题严重，股市缺乏资金入场系大忌，暂时A股只能转为防守。

至于港股噚日低开，现货见过19178低位后反弹，可惜全日成交额亦只有1436亿元，同样系面对缺水问题。虽然噚日重牛区已被屠杀，大家都期待大市有个似样啲嘅反弹，可惜缺乏成交下，港股就算唔再大幅向下，目前亦只能喺19500水平徘徊，一如噚日所讲，港股需时整固，个别估值合理嘅重磅股可分段收集，但未宜进取，只能小试牛刀，继续低买高沽多做短线操作，先有机会捱过呢次股市寒冬。

古天后

(徐狄怡，证监会持牌人)