独家丨AL曾情绪受困吓亲「教母」爆红压力大失眠匿埋喊

2022-03-01 22:00

「教主」Anson Lo（卢瀚霆）@MIRROR近日推出新歌《Mr. Stranger》，讲去年底一度压力爆煲感受，他承认自走红后，成为外界焦点，粉丝对他有既定形象和期望，令他因担心表现跟粉丝期待有落差，开始钻牛角尖情绪受困，试过爆喊、失眠，体重直线下降，连「教母」出口开解都冇用，幸好今年初靠新戏角色想通，学识搵到当中平衡，这年更想挑战演老粗角色。

采访：杜杜发型：Denny ku@CHIC Private I Salon 化妆：Rainbow Chung@Annie G. Chan Makeup Centre 服装：Paul Smith、Joyce、Giuseppe Zanotti

歌曲由Rock Sir编舞，为AL专登设计模仿吸血鬼爪牙姿态手势，令大家更易记歌名。

AL早前一度因压力，搞到爆喊、失眠兼暴瘦。

新歌MV甫推出反应已经相当热烈，3个钟即破22万点击，当中吸血鬼造型更获激赞，Anson Lo看到粉丝反应亦好兴奋，「好开心大家好热情，我都有睇大家嘅回应，真系会令到我发笑，用啲字眼真系好cute，哈哈！我唔想读出嚟，咬我嗰啲，大家用咗好多修辞手法去演绎『咬我啦』，好搞笑亦都好窝心。」新歌讲大众对他有既定形象，若展露大家不熟识面向，究竟外界是否接受？因这想法令他给了自己很大压力，故想透过这歌跟粉丝分享最真实感受，「我上年年尾嘅压力，因为呢个原因，我好想将自己一个好真实嘅感受摆落呢只歌度，去分享畀我嘅fans听，上年嘅压力爆煲究竟系发生咩事。」

《Mr. Stranger》MV的吸血鬼造型，获粉丝大赞。

MV中，AL有多个靓仔造型，这个全黑透视Look，好性感。

压力来自本身

回想压力爆煲源头，AL承认除了担心手头上搞紧的Project质素外，外界愈来愈多目光或者焦点放在他身上时，就愈惊自己达不到外界期望，好惊令到大家失望，「上年倾过好多同演戏有关嘅Project，倾过好多唔同角色性格或者形象，嗰啲角色性格唔系大家睇惯斯文、整洁、好正直，可能大家2021年睇到我嘅风格都系偏向咁样，大家突然间见到变晒会唔会好惊讶呢？好多呢啲Project叠住，做每个决定都要谂咁多嘢，真系好大压力。」他承认压力主要来自本身，「人就系咁，好多时困扰嘅嘢，唔系人哋畀你，系自己谂出嚟畀自己。」

全红贴身装，衬埋红色隐形眼镜，一样好型仔。

MV中AL跟小妹妹合作，他还教对方做歌曲招牌动作。

承受不到压力的日子，AL连身体都出现问题，「最down情况系爆喊，失眠啦！嗰排年尾开始就愈嚟愈瘦，我唔知关唔关事，总之嗰排压力好大，身体嘅吸收能力都好低，所以好似食咩都唔会肥，休息又唔够，瞓得又唔好，所以近排觉得唔得要积极啲去增肥。」不过AL未肯透露实则减磅几多，更承认当时就连最了解他的「教母」出手开解，一样未能帮到他减压，「每晚我返到屋企佢咁啱醒咗，都会出嚟见一见我，佢都会作为一个人生导师同我倾，可能好多时有啲决策上嘅嘢，我都会问佢意见，但系解铃还须系铃人，而呢个铃系自己系上去个头上面，都系要靠自己谂通，好多时我妈咪做一个人生导师角色，但系都唔系100%足够。」

《Mr. Stranger》MV推出3个钟，即破22万点击，相当厉害。

「教母」是AL妈咪外，他更视为人生导师分享心事。

想挑战演老粗

直到踏入2022年，AL拍摄新电影，反而透过演绎角色慢慢释怀，学识放下身上包袱，「1月时我接咗一部电影，个角色名叫『张子杰』，呢部电影几帮到我，因为主旨系释怀同唔释怀嘅关系，人生要放下嘅嘢有好多种，譬如放下你对自己嘅包袱，做完呢个角色畀咗我好多启发，放下某啲嘢会着数过你去执着。」现在他更搵到个平衡，不会再考虑太多外界睇法，「呢次经历压力爆煲，令我明白到当你内心有呢啲挣扎时，冇人帮到你，就算身边嘅人几识讲嘢都好，你要钻牛角尖咁样谂嘢，系冇人说服到你，其实都系靠自己谂通。我要相信自己判断去做嗰样嘢，首先一定唔会害到人，二嚟系对自己学习上有帮助，去做一定有好处，如果不幸地大众偏向唔接受，自己都会愿意承担呢个后果，都系一个成长经历，唔应该固步自封。」

压力搞到AL食极都唔肥，消夜食大碟饭一样冇用。

早前拍摄新戏演绎「张子杰」一角，令AL解开心结。

想通了的AL，已不怕作更多新尝试，特别在演戏方面，新一年亦有新目标，「好想演戏方面做啲同上年好唔同嘅嘢，同斯文、乾净、正直相反，多啲180度转变嘅角色，可以畀大家睇到，Anson Lo都可以做到呢啲角色，演绎到呢啲性格。我想试一啲好粗鲁、烂烂挞挞、不修边幅嘅角色，大家未见过我，同埋自己都未试过嘅演戏方法。」