独家丨李丞责提醒要大扫除迎新春教你风水摆设趋吉避凶

2022-01-27 21:00

早前著名玄学家李丞责博士为本报读者预测虎年整体同12生肖运程，今次就同大家讲吓大扫除要点做，仲畀埋风水摆设小贴士助大家趋吉避凶！李博士又特别提点虎年不同之处：「老虎最紧要果断性同坐言起行。」叫大家今年记住呢个座右铭。采访：秦咏姿

李博士都知都市人未必记得年年要大扫除，不过想有运行就要落啲心机，「大扫除时用柚叶、柏叶、黄皮叶，3种都系辟邪嘅叶。另外香茅、柠檬叶、橄榄叶都有帮助，大扫除之馀，顺带洒吓呢啲叶嘅水，希望净化重生，将屋内污气驱除。能够点吓沉香、檀香，薰吓间屋就更好。」大扫除最好当然系择日做，但年廿八都系个去除污垢嘅好日子。

李博士话想新一年好运啲，不妨落啲心机大扫除！

中宫位忌摆郁动嘢

虎年要睇姻缘，要留意九紫星在南边，「南边不妨插鲜花，一般来说有九紫星都会摆九枝花。亦可摆放鲜色物件或者粉红晶石，长着一盏灯都可以。」至于偏财位就唔系人人有，不过都可以考虑正北嘅偏财星，可以摆水晶洞等。而正财位就喺东北，李博士提醒要小心处理：「其实可以摆流水摆设，但因为东北位同时都系太岁位，不宜郁动，等于太岁头上动土，最好摆同太岁相合的条件，如猪形摆设，配合流水就最好，既合太岁又可生财。」而嘈吵或血光之灾位在中宫位，家中正中位摆安忍水、青铜器、铜钱等可化解五黄，但切忌摆风扇等郁动嘅嘢，而红色都会生旺土煞五黄。