俄仔Ansheles转妖艳Look出碟做歌手嫌以前冇灵魂豁出去做自己

2022-01-27 09:00

2017年，俄罗斯型男Artem Ansheles凭住一口流利广东话拍摄的《请阿妈饮凉茶》一片而爆红，然后吸引ViuTV搵佢拍剧同做节目，不过18年拍毕好受欢迎的《返归啦俄仔》后就冇再为ViuTV做主持，只曾于20年客串《地产仔》。

17年拍摄的《请阿妈饮凉茶》短片。

18年的《返归啦俄仔》。

18年的剧集《迷失假期》。

其实自从打入香港市场后，俄仔Ansheles的工作以代言广告为主，亦成立自家潮牌EARON，19年曾经推出首支广东歌《麻麻哋Day》，原来俄仔内心深处最想做歌手，去年10月已推出英文单曲《Bunny》，12月再推另一英文单曲《Ignite》，两首歌嘅MV已推出，曲词加Styling由俄仔一手包办。

现年27岁的俄仔将于2月2日年初二推出首张专辑《I’m Shell-less》，佢出PO表示，「好多人可以唔使自己写歌唔使自己做埋visual，但我接受唔到。过去一年我每一日都埋头苦干创作关于呢张专辑嘅一切一切，希望可以造出令自己自豪的作品。由写歌、音乐制作到专辑嘅一切视觉设计，呢张专辑完完全全反映咗我嘅理想与能力。我唔想成为一个平凡的，大衆化的艺人。所以我选择独立做呢张专辑。我认为艺术唔系在于你摆几多钱落去，或者你从中赚到几多钱。新世代嘅创作有新世代嘅方法，沉闷必须要被打破，久违嘅艺术娱乐应该要喺香港开花。我希望自己能独立地做自己，让大家重新看见不一样嘅我。」

俄仔嘅首张专辑《I’m Shell-less》。

俄仔口中嘅不一样包括形象，佢为咗重生，IG同YouTube都Delete晒旧片同旧相，IG嘅PO换嚟如JOJO Cosplay的妖艳新Look，不过佢嘅FB仲有Keep旧相。另外，佢又出咗段10分21秒，全英语嘅自问自答片去解构自己嘅转变，当中透露自己嘅妖艳新Look其实系真正嘅自己，留意片尾，由制作访问到美术等全部由俄仔包办。

好有JoJo Cosplay Feel。

其实啲相几靓。

俄仔选择豁出去做自己。

玩自问自答解构形象突变及点解出碟。

自问自答片由制作到美术都由自己一手包办。

问:点解突然唔做主持而尝试做音乐?
答:唔突然，谂咗好耐，疫情令我反思自己嘅人生，唔满意之前所做嘅一切，因为完全代表唔到自己，觉得冇灵魂，我有事好想分享，最简单就系透过音乐表达，透过音乐可以完全展示真正嘅自己，以我想要嘅方式做自己。

问:你嘅风格及形象同以前好唔同。
答:呢个系我一直以嚟嘅样，但我从来冇机会真正表达过，所以实际上冇改变，只系开始做自己，做我想做嘅事，其实内里无变过。以前拍摄都会安排好晒我要着咩讲咩做咩，而家我可以展现我想展现嘅嘢，讲我想讲嘅，做我想做嘅，成为我想成为嘅人，我就系想着成咁，其实无乜嘢大改变。

17年好阳光。

20年已经开始展露本质。

21年愈嚟愈妖。

问:制作一张专辑是一件非常复杂，艰难及昂贵的过程，为甚么不选择签唱片公司而自己做?
答:首先好不幸嘅系冇唱片公司搵我，希望即将会发生，不过当你收取公司的资金去做音乐就会有一个责任，正如我提到，我想做自己，做我想做嘅事，作为一间音乐公司旗下歌手一定有限制。

问:你冇受过正规音乐教育及背景，但去做一张大型音乐专辑会唔会好困难?
答:呢个系一场恶梦，因为之前冇做过专辑，只出咗几首单曲，唔可以同呢次比较，今次好多嘢都好陌生，咩系混音同mastering?以为自己可应付，发现好多嘢我唔识要去学习。但我唔可以从乐理开始学习，我实在冇呢种耐性，我尽我最大努力学习基本知识，学习一啲程序以便能够作曲。首先制作咗我第一个DEMO，我至少可以同监制沟通，我想要咩方向，呢个过程中学习到好多嘢，好多嘢结合先可以成为一首歌。

问:MV入面嘅道具同服装都系自己整，点解选择自己做?
答:为拍《Ignite》呢首歌，着咗闪亮网状水晶上衣，我买咗一块布料，想用嚟做西装，问裁缝做唔做到，对方一口拒绝话做唔到，我当时唔明点解做唔到，明明咁容易，所以就自己做。例如专辑封面嗰个贝壳，自己做嘅大贝壳，谂唔到有第二个人可以帮到我，所以我去尝试，尽最大努力做，以确保绝对完美，最后做咗两个月嘅贝壳掉咗去垃圾桶，而为拍MV做嗰件水晶衫，拍嘅时候已经烂咗。