独家丨COLLAR任讲拍拖团员迟到要罚 Marf芯駖Winka Candy大爆私密事

2022-01-20 22:00

由《全民造星IV》8位参赛者组成的女团COLLAR，出道即爆红，连天王黎明都睇直播，ig开4个钟已吸13.6万关注，更有粉丝成立「前夫反击战」群组力撑，不过人红自然是非多，同时亦惹起不少是非。COLLAR接受《头条》访问，除了回应种种争议，仲讲团队禁忌同团规。而成员Marf会大谈感情事；芯駖回应被插年纪大；Winka就公开复杂家庭背景；还有Candy自爆签约后曾被花姐劝退。采访：杜杜摄影：沈健程、张咏森发型：Heitai、Kenji Chan、Vic Lai、Kristy Wailing、Taurus Lee
化妆：San Chan、Kineks Ho、Cathy Zhang、Janice Wong 服装：Majeparis(Gao)、Celine(Candy)、Chloe(Sumling)、Marcjacobs、Miumiu、Louboutinworld(Marf)、Sandroparis、Majeparis(Ivy)、Berluti、Hm、Louboutinworld(Soching)、Hm、Moncler(Winka)、Miumiu、Louboutinworld(Day)

COLLAR团员为了保持身材，虽然食嘢唔会罚，但会互相提醒。

出道活动被插是「时装灾难」，幸好有天王黎明撑睇直播。

对于甫出道有好成绩，队长Gao话：「首先要多谢支持我哋嘅人，对于我哋嚟讲好惊喜，冇谂过咁多人支持。」COLLAR受关注同时亦惹是非，首现身造型被踩「时装灾难」，又话LOGO、海报设计、出道歌《Call My Name》MV都有抄袭成份，Candy就澄清，「LOGO、影相甫士都有好多幕后团队帮我哋设计，系佢哋心血同心思，希望大家唔好误会佢哋系抄袭，辜负咗佢哋努力。」芯駖亦否认抄歌，「主流兴呢种音乐，可能速度同埋唱法好类似，又未去到一模一样。」

COLLAR概念照被指抄袭韩国男团NCT。

Gao话队友好自律，做队长未觉大压力。

Marf暂忘儿女私情

团员犯错会否有罚则？Gao透露暂时迟到有罚，「有个玩法就系迟到，第二日Call最早，呢个方法系由我哋伟大嘅阿Wing（经理人）谂嘅。」至于迟到担当，Marf自动招认，「烂瞓成日都赖牀，可能闹钟要搵个传统啲，手机已经救唔到我，但打电话会醒。」Winka即自告夺勇，「不如我做你闹钟。」她们又大赞公司开明，拍拖也不会是禁忌，Winka和So Ching举晒手自认拍紧拖。不过早前被网友爆跟广告模特儿卢思睿（Bryan）拍拖的Marf ，就强调目前事业为重，「自己系个着重情义嘅人，所以好多嘢会睇定啲先会去做下一步，𠵱家将重心摆晒喺团队度，同埋我哋𠵱家根本连约朋友，同屋企见面时间都冇，所以恋情或者其他私事，暂时冇乜点处理住。」

Marf话目前冇时间拍拖，以事业为重。

Marf早前被网友爆跟广告模特儿卢思睿（Bryan）拍拖。

芯駖以35岁之龄入女团，惹起好多争议，但她心情未受影响，「呢个问题一路都唔担心，《造星IV》开始大家都知我年纪，好多粉丝DM我『你呢个年纪能够去追梦，或者踏出嚟唔惊人哋指指点点，做自己锺意嘅嘢，都激发佢哋放低固有嘅嘢去尝试』。惊喜香港观众都走得几前，接受能力都好高，同埋公司同阿Wing都好勇敢签咗我，我唔觉得年龄系问题，尤其现今科技非常发达，大家保养好有心得，同埋我同佢哋相处完全冇介蒂。」19岁的Day亦承认同芯駖冇代沟，「佢性格比真实年龄低，佢性格好有反差。」

芯駖承认好甩碌，经常唔见手机。

Day笑指并非队中「瞓觉担当」，因大家都锺意瞓觉。

Winka妈妈患精神病

Winka参加《造星IV》前已出道，当时接受新城财经台《原味生活馆》访问，讲到成长在单亲家庭，中五时妈妈因精神病入院，要独力照顾细佬去糖水铺打工，之后仲要停学。她承认妈妈未康复，幸好18岁细佬好生性，「妈咪仲系严重，好希望有日佢会回复返以前咁，但无论妈咪变成点，我深信佢系支持我，细佬都好听话，我比赛期间自己事都自己解决，屋企事比较少拎出嚟讲，因唔系咩开心事，但系屋企同背景点变都好，唔限制我去做任何事，我想透过自己经历去鼓励有同样经历、家庭背景想追梦嘅人。」她更公开已跟男友同居，「唔需要隐瞒，当然我唔会喺街度咁公然啦！」她最开心细佬变了头号fans，「佢最近竟然将IU张相转咗做我张相，放喺银包，我好开心呀！呢个好微细动作令到我好warm，I love you细佬！」

Winka大方公开家庭背景，以及妈咪病况。

团队冇规定唔准拍拖，So Ching大方公开有男友。

Ivy和Candy一直被指唱跳实力不够，两人都承认有待改进。Candy更自爆签约后曾被花姐劝退，「签完约我哋一齐听咗新歌，当时我哋食紧点心，花姐都系度，佢就话『Candy你仲食得落，我系你就即刻毁约』（又用激将胀法？）系呀！我又好似当初咁答佢『你又知我唔得』。其实听歌我系有啲淆底，但花姐讲呢句后又激起我斗心，压力又冇，唔识咪搵队友帮手。」