独家丨陈豪醒你冇得输冧妻方法 活力中佬 50岁跳街舞好腰力

陈豪(Moses)于今年TVB台庆「思密Party」环节中，应李思捷要求讲出「最想结婚的TVB女艺人」时，陈豪即答陈茵媺，被网民激赞心中只有老婆。事实上阿Mo为咗畀老婆及3子女幸福舒适生活真系好落力，日前他为新剧《四十二章经》拍外景，剧情需要大跳街舞，虽然手脚唔多协调但努力去跳，疫情下好注重防疫嘅阿Mo仲跳到成个人贴晒落地，睇唔出50岁嘅佢腰力依然强劲！采访：方骞平 摄影：叶君海

由TVB金牌监制陈维冠(Joe) 监制的《四十二章经》是一套融合历史及功夫元素的剧集，饰演猪肉婆嘅龚嘉欣前世与鳌拜有关，今世遇上「古老石山」教授陈豪，二人经常发生磨擦如前世冤家。日前两人于上环拍外景，场口讲述陈豪大跳街舞𠱁返嬲嬲猪嘅嘉欣。

嘉欣赞陈豪冇气喘

阿Mo平日冇乜跳舞，为咗接受呢场挑战都打醒十二分精神，记者现场直击，当日开早班嘅陈豪精神爽利，演出前仍摄时间跟老师恶补，加码苦练。到正式埋位，他随住老师喺机后打拍子123456…提示，跟随音乐旋律扭动身体，前后摆动条腰，再揈手揈脚玩打功夫式free style，跳到踎咗落地，再用手及身体撑喺地面系咁「印」，最后旋转一个圈后秒速弹返起身。虽然动作有啲生硬，但总算流畅，最重要勇气可嘉。估唔到50岁陈豪仲好有活力，尤其条腰好有力，浑身是劲。

当日最受欢迎演员
当日陈豪好受街坊欢迎系咁被「集邮」，对于挑战难度跳街舞，他笑说：「真系未试过，我完全唔知发生乜事，监制突然落指令话一定要跳街舞，惟有趁唔使开工嗰日练咗几个钟，哈！我有Hip-Hop细胞，所以出嚟好似样。」在旁嘅龚嘉欣都大赞阿Mo超劲，连跳两分钟都冇气喘。陈豪笑住话有畀条跳舞片囡囡睇：「佢大赞『我爹哋系全世界最好嘅。』」

好Enjoy家庭生活

对于台庆当晚表现获赞畀到老婆安全感，陈豪笑说：「我都唔知答乜咪将肚入面答案讲出嚟罗，其实系我想黐实老婆同啲细路，有家庭生活系咁㗎啦！我好Enjoy同佢哋一齐，全部时间畀晒佢哋，就算陪佢哋做啲无聊嘢都冇所谓。(跳返part舞𠱁佢哋？)佢哋想嘅话我会浑身解数做乜都得，其实维系夫妻同子女关系要放心血落去。」阿Mo仲教大家最简单嘅冧妻方法，就系唔好有秘密，佢话由day 1开始就系咁做。