Patrick Sir为帮朱凯婷买支水 痛失台庆2万5大利是

TVB《万千星辉贺台庆》昨晚（19日）在欢欣气氛下圆满结束，「六合彩之女」李芷睛独得38万元大奖，但不是人人咁好彩，Patrick Sir（林溥来）就因为未能在限时内上台领奖，而失掉2万5千元大利是。

原来Patrick Sir之所以错失良机，是因为「太贴心」，为《东张西望》拍档朱凯婷（Heidi）买水饮，结果就见财化「水」，认真阴公猪。Patrick Sir太太关宛珊今日在IG限时动态上载抽中Patrick Sir领奖一刻片段，但却见老公迟迟未有上台领奖，她留言：「话说我有预感系抽中佢，拎电话出嚟影，真系佢喎，劲兴奋！点知佢冇出现。」仲有一个喊样Emoji。

Patrick今日接受《头条娱乐》访问时，直认当时收到几十个WhatsApp问：「你喺边？」，他指朱凯婷突然表示口渴，他即表现男士风度帮手去买水，还说：「我都想行吓！」怎料到便利店买水兼食完烧卖后，经理人致电表示抽中自己，但为时已晚，笑言老婆还WhatsApp问：「去屙屎呀？」不过，Patrick Sir好维护Heidi：「真系唔关Heidi事嘅，系我主动提出帮佢，因为佢着住高踭鞋，唔想佢行咁远。佢系非常开心，亦都好内疚。」

不过，塞翁失马焉知非福，Patrick仍觉得好开心，笑说：「今日返公司做《东张》，台前幕后都戥我唔抵，连烧味师傅都斩大碟啲畀我。虽然失去2万5千蚊，但我得到好多关怀同爱锡，仲想特别鸣谢Do姐同叻哥，睇番片，见佢哋好有心帮我拖等我入嚟，佢哋好好呀。」而朱凯婷感到「超无奈」，自言回家后即被老公问起，自言请不起对方食2万5千元一餐饭，但可以请食2千5百元的晚饭补数。