独家丨谭俊彦开到口想攞视帝 拍剧攰到变人乾爆晒疮

谭俊彦（Shaun）于首部担正的台庆剧《换命真相》中的演技获网民赞赏，加上撞样《鱿鱼游戏》的李政宰，个名无啦啦成为热搜，仲成为今年视帝黑马。Shaun恨奖恨到出口：「我最实际，只想夺奖之后工作稳定啲，𠵱家养两个小朋友好贵，名利反而唔重要，我呢个成熟年纪冇咁易被冲昏头脑。」采访：方骞平 摄影：张咏森

今年TVB四大台庆剧宣传相中，谭俊彦拍住郑嘉颖及马国明企喺第一排中间位，Shaun两公婆睇到都好惊喜：「老婆话我喺TVB 6年，终于有机会企喺中间喇！都开心嘅，观众一步步睇到我唔同嘅一面，当然都有啲人好主观嘅，一世都弹我冇乜表情，又成日话系爸爸狄龙安排哂(工作)，佢都退咗休咁多年啦！」

视帝睇好张振朗

Shaun每年都有份争夺视帝，坦言有憧憬过上台领奖画面：「我梗系想自己得啦，食住《鱿鱼游戏》系会带嚟亲切感嘅。不过，对手张振朗呼声都好高，佢除咗进步好快，仲系TVB训练班出身，𠵱家公司好需要年轻一代演员嚟承接，至于视后我私心系黄智雯。」赞完张振朗，Shaun再出力为自己拉票：「拍《换命》时我同朱敏瀚叠住拍《拳王》，我哋一Cut机就举哑铃，开工前日日跑步操肌，加上要照顾家庭，根本冇时间休息，当时攰到好似人乾咁，真系用意志力嚟撑住，嗰时捱坏咗身体，搞到荷尔蒙失调系咁爆疮，呢啲真系TVB男主角嘅通病，前几日我见到有两剧在身嘅袁伟豪块面爆疮就好心痛，因为我哋感受到嘅嘢，外边人未必感受到，所以我好锡呢班兄弟姊妹。」