独家丨马国明被大妈狂赞靓仔挥晒手 数百街坊围拍外景

呢期马国明曝光率好高，台庆剧《星空下的仁医》有佢份、拍摄中的《隐形战队》亦关佢事，加上又传佢同汤洛雯就快结婚，今次有啲新意，话佢已订名牌婚戒，马明同汤洛雯照旧否认，前者仲话每次有新剧就传佢结婚：「咁我结得几多次婚呀？」传喜事好过传分手吖，俾人恭喜得多，马明呢期容光焕发靓仔晒。上周六，马明及唐诗咏等人为《隐形战队》在石门站外拍外景，被数百街坊围住嘅两人无诈型，听到大妈以唔纯正广东话大叫「马明好高大好靓仔，同电视一样呀。」马明仲忍唔住笑笑口挥手添。采访:谭壹致

当日，剧组朝早7点已喺石门站外开始拍摄，因为周六关系，加上地理位置，一家大细睇拍戏当娱乐，搞到愈拍愈多人围观，至中午12时放饭，百几人睇住马明、唐诗咏及刘颖镟食饭盒，都几好笑。

马明当日好吸粉
食完饭，马明等人补完妆就再开工，当日剧情系饰演警察的马明同唐诗咏等人，要劝个身有炸弹嘅贼(彭怀安饰)冷静啲，之后爆炸，马明就扶住唐诗咏走，但都被炸药嘅威力弹开，两人继而仆落地下就完事，话难唔难，但因为要多角度拍摄，都Take咗好多次，但马明都无变样，仲Keep住好笑容，听到大妈叫佢个名，赞佢「好高大好靓仔，同电视一样呀」仲系咁笑同挥手。

大妈小妹妹都冧
拍到下昼5点收工，马明等演员好兴奋，围观嘅街坊更加兴奋，因为终于可以走近马明求合照，唔系讲笑，以「天然呆」驰名将军澳嘅马明原来深受大妈欢迎，一见佢换好衫就拎住电话涌住埋身影相，个个用个头挨住马明膊头合照，马明来者不拒，连细路女都「唔该马明影张相吖。」咦，咁搞法，马明今年有望冧庄视帝喎。