独家│林盛斌眼利捉实余咏珊吹水 Keep住用长银包增财运

林盛斌（Bob）喺TVB出名多Job，有肉地又有喜感嘅外形仲系广告客户宠儿。Bob平时忙到无停手，日前喺又一城见到佢都急步行，唔知系咪赶开工呢？不过佢半路中途撞到前TVB高层余咏珊（Sandy）都好识做，企定定打招呼，对住前高层都咁有礼貌，抵佢多Job做啦！采访：谭壹致

日前晏昼3点半，见到Bob喺又一城好似支箭咁急步行，飞奔去询问处畀泊车钱，加上佢圆碌碌嘅身形，相信有唔少途人都认到佢。其间拎出一个好熟口面嘅名牌长银包，冇错！旧年佢曾经喺社交网出Po分享旺财秘诀，提网民可以用长银包增财运，佢就觉得好有用。仲话长银包要愈换愈贵，当时就系分享呢个名牌长银包嘅相。又话用长银包呢个习惯已经Keep咗10年，呢日见佢仲用梗长银包，睇嚟真系愈搵愈多。

见前高层余咏珊即企定

赶住去攞车嘅Bob中途撞到前TVB高层余咏珊(Sandy)，Bob做开主持一眼关七，即刻捉实Sandy打招呼，寒暄足30秒。Sandy其实都好赶时间，所以佢同Bob讲再见之后就急急脚去到餐厅门口，会合一名女友人食泰国菜做下午茶。佢哋等位嗰阵都主动用「安心出行」App，用餐期间余咏珊讲嘢手势多多，似乎几激动，最后由朋友找数请食饭一齐走人。