独家丨庄韵澄产后变32F为囝囝随时封胸 做咗阿妈减少性感演出

去年11月，庄韵澄（庄端儿）闪嫁拍拖仅7个月嘅经理人吕成忠，𠵱家囝囝肥「波子」经已7个月大，眼大大肥嘟嘟超可爱。「升呢」32F「辣妈」嘅庄韵澄自爆冇嫁错郎！对于旧爱张致恒修心养性做爸爸，又努力工作搵钱还债，庄韵澄寄语他要做返个负责任嘅男人：「等小朋友大个时睇到，无论个爸爸做错乜都好，都会负返责任嘅。」采访：方骞平 摄影：叶君海

2016年9月，庄韵澄（庄端儿）受唔住张致恒（Steven）多次偷食，忍痛斩缆后一度抑郁到想死，Hurt足3年几先敢再爱，家阵老公好锡两母子。日前庄韵澄揽住宝贝仔「波子」到沙滩初体验，见肥B皱晒眉头，唔太Like脚仔掂到海水，庄韵澄就将「波子」凌空飞起𠱁佢笑，母子互动甜到入心。产后7个月庄韵澄回复返做「女」身形，虽然停咗喂人奶，但上围不单止冇缩水，仲坚挺地升咗半cup变咗32F「西瓜胸」，亦系肥「波子」自私瞓嘅「厚切人肉枕」。

互相信任冇嫁错郎

庄韵澄身形Fit返晒亦宣告复工，「BB好黐我，好爽好开心！𠵱家佢开始识认人，而且怕陌生，所以带多啲佢出街。佢好乖好易凑，初生至今都冇饮过夜奶，一觉瞓到天光，现阶段佢识得反身，瞓到清早五点会扶住企起身，冇人理佢就爆喊。」稍后她会拍新片，谂住随身带住BB条手巾仔嚟索吓佢啲味「止咳」。「波子」人见人爱，但庄韵澄强调唔怕失宠，老公反而锡佢多咗：「就算产后体重暴升至70KG(154磅)，肥到好似只猪咁，佢都唔会嫌弃我。我哋互相信任，好似朋友式相处唔会有拗撬。」虽然在婚讯后连环爆出老公失业兼破产、争街数等负面新闻，但庄韵澄强调冇嫁错郎，唔会后悔。

寄语旧爱做好榜样

对于旧爱张致恒洗心革面跑数还债，对此，庄韵澄都赞返Steven一句：「听闻佢还晒啲钱畀冯镓潆（Naomi）喇！佢肯去打拳赚钱养家，做返个负责任嘅男人都好啦！等小朋友大个时睇到，无论爸爸做错乜都好，都会负责任。叫佢勤力啲操好啲身体，勤力啲打多几场拳，赚多啲钱养老婆同埋两个仔。」提到渣男前度终于成长，庄韵澄忍唔住笑，「哈！介唔介意我咁讲，我甩难咗好耐！佢家姐(张咏恩)同老婆(雯雯)担心啲，不过，冇谂过佢咁乖突然结婚仲生埋两个仔，咁生小朋友系好嘅，作为家长每日喺佢哋身上学到嘢真系会成长，原来做咗妈咪系会不顾一切咁照顾小朋友，要做好榜样畀小朋友睇，希望佢都系啦！」因此，庄韵泼以后都唔会再刻意性感，今次影泳装相都系想展示减肥成果。记者笑问庄韵澄会唔会带埋「波子」跟张致恒两名儿子一齐玩？她即耍手拧头：「哎呀！唔会住…我个仔太细(唔识玩)。」