独家丨陈凯琳当街跪地𠱁大仔 「最强老窦」郑嘉颖有计速拆弹

陈凯琳(Grace) 18年嫁给年龄相差22年郑嘉颖后，三年抱两，一家四口经常在社交平台分享开心片段，Grace婚后停工专心凑仔，跟老公约定「唔使开工就要帮手」。日前，一家三口及一对母子朋友在街等上uber，Grace为𠱁仔不惜当街「跪地」，但都不及最强老窦郑嘉颖有计，一个汽球已经令大仔郑承悦（Rafael）开心晒。 采访:梁志明

自从今年6月主持完节目《日日妈妈声》后，陈凯琳再度回归屋企，继续照顾一对仔，暂时休息在港的郑嘉颖，亦兑现承诺陪玩陪去街，早前Grace就分享老公跟仔仔踢波片，网民更大赞老窦识做劲有戏，承悦会以为自己踢入一球世界波。

囝囝黐老窦
在家陪仔，郑嘉颖日前又孖Grace带大仔行街shopping，在铜锣湾街头等上uber的十多分钟，2岁半大仔已经等得唔耐烦，突然甩开妈咪想行出马路，好彩Grace动作快即时跪地揽实，见阿仔冇晒心机，郑嘉颖立即出手帮老婆，跟仔仔讲完几句，再将手中汽球绑在承悦小手后，𠱁得仔仔立即生猛晒。

郑嘉颖有计拆弹快，之后便抱住承悦上车。而Grace亦自动波一个人坐前座，等仔仔乖乖黐住老窦坐车返屋企。