独家丨麦大力35岁TVB爆肌新人王 访问带埋健身教练 即食花生酱谷胸

麦大力（Derek）去年参加《冲上云霄大选》夺冠入行，未够一年他已参与过不少节目，除了主持明珠台《港生活·港享受》，最近亦有参与剧集《廉政狙击》觉得主持和演戏一样好玩兼够挑战性，但中英混血儿的他完全唔识睇中文，幸好有女友简淑儿充当私人补习老师帮手。35岁才做新人的Derek，最近更频频操肌，希望可以挑战更多角色，好似儿时偶像王敏德一样演飞虎。这天影相，Derek更带埋私人教练Karl到场边操肌边影，事前更即食花生酱助爆肌谷胸。撰文：杜杜  摄影：沈健程  发型：Dave Wong＠Hair Corner K11.教练：Karl So@GYM TOWN FITNESS

Derek虽然自小在香港长大，但飞机师工作主要讲英文，所以入行后最难适应是要讲广东话，特别是拍剧时，「要背晒啲剧本，拼晒音，翻绎好晒先至放入个脑度，记住啲稿又要演，全部系未试过，真系一个挑战。」试过主持和演戏，Derek觉得两样都好玩，主持可以训练到口才，而演戏有故事性好唔同，而主持《港生活·港享受》要录中英文版本，会帮到他练中文，「一个英文稿一个中文稿，两个都系讲一样嘢，我咪可以学啲新中文字。」不过他承认拍英文版本快得多，到拍中文版要双倍时间。


简淑儿私人补习中文

不过Derek甜住承认，现在有女友简淑儿情况就好得多，「佢会一齐帮我睇剧本，帮我读出嚟，我写低，之后我哋再倾个意思，识个意思会容易啲记个剧本，因为有啲字我系未听过，同埋写嗰啲中文同讲中文有唔同，呢样嘢对我嚟讲系难啲，我明个意思会容易少少。」提到简淑儿早前接受《头条》访问时，透露本不想跟圈中人拍拖，但Derek竟对她表示自己不是圈中人，对此Derek笑言自己冇讲大话，「我之前做机师，或者有日会返去做，咁我系一半一半，唔系100%呢行，我咪咁讲罗！」


Derek坦承35岁才当新人确实有压力，「学嘢会慢过后生啲嘅人，做咗10几年嘢都会有啲好同唔好嘅习惯，好难改变，好彩同我做嘢嘅人都好有耐性，好体谅我，畀机会我。（自己表现畀几分？）10分满分都有5至6分，如果讲到对白出嚟我都好开心啦！但我都会去试演戏，其实我对自己要求都好高，觉得唔够好都唔需要人哋话我，我会想再做好啲。」为了中文可以快啲进步，除了女友主动不跟他讲英文外，他亦会要求朋友跟他讲广东话，「譬如健身教练，我叫佢哋讲中文，又会睇多啲中文戏，仲开始听妈咪年代嘅音乐，听得多啲个音会入脑啲，睇到啲稿讲出嚟会正少少，而家听陈百强啲歌多，因为妈咪锺意佢，我细路仔就开始听。」

恨似王敏德演飞虎

为了演更多不同类型角色，Derek近期更狂操肌，他承认恨演纪律部队，「日日操就系为咗咁，细路仔时我同阿哥成日睇王敏德嗰啲戏，佢都系Mix，又系外国返嚟，细路仔我开始睇佢啲戏，（想演《飞虎》？）希望有呢个机会。」操了几个月，他对身材尚算满意，反而唔想太大只，「个壳冇乜变，但系肌肉多咗，希望提升自己，身材都要愈嚟愈好，而家开始操，老咗冇咁辛苦。」



当机师时，Derek主力飞上海、日本、台湾、印度及北京几个城巿，外界总觉得机师好容易吸引异性，已名草有主的Derek强调要睇个人问题，自己工作时就好认真。16岁开始初恋的他，拍拖次数十只手指数得晒，亦只有一位外籍女友，他解释因对亚洲女性情有独锺，「我多啲时间喺香港，妈咪（系香港人）都有影响，我又成日同妈咪嗰边啲人一齐，爹哋得个妹又冇细路仔，所以我自己偏中国多过英国。（而家女朋友喺美国大，但系中国人咪非常好？）都几好，哈哈！」