张继聪要囡囡讲6次「多谢大爷」 自认好衰：依家大个玩唔到

小朋友天真烂漫，好多时被大人整蛊都唔知，但亦系最得意可爱之处。张继聪今日就喺社交网上载一条以糖果引诱囡囡张靖（Kakaball）「就范」嘅短片，一直要个女同自己讲：「多谢大爷」，足足连讲6次都未够，张继聪之后更不断提出新要求，又要阿女边讲边拱手作揖，又要阿女笑，又要阿女扮嬲，最后仲要嘟埋嘴仔；最后有一把张继聪之外嘅「正义男」声话：「你唔好搞佢啦，你畀就畀唔畀就算啦。」睇怕张继聪都唔知仲要提出几多要求，先肯畀一粒糖个女。

囡囡似乎都习惯咗被爸爸整蛊，总之目的达到，拎完粒糖就头也不回，拜拜你条尾。不过，呢段片望落似系张靖岁几、两岁时拍摄，依家囡囡已经4岁，应该冇咁容易玩到，难怪张继聪留言话：「依个老豆真系衰。冇罗，依家大个咗啲，玩佢唔倒（到）噜。不过重点系片尾，妹妹攞咗粒糖之后，即闪。」