独家丨AL 求跟Jer仔组「幼稚园鸡」CP 战胜自己 坦白同队友讲肉麻嘢

刚爆肌拍广告的「教主」Anson Lo（AL），新歌《Megahit》不单首度邀得黄伟文填词，MV亦有大量嘉宾客串演出，MV推出一周点击已冲破200万。今次歌曲讲人与人之间关系，原来AL以往好怕对MIRROR队友坦白，最惊面对成员竟然是最细的Tiger，但自夸大个仔想通了的他，自爆对Tiger讲肉麻说话过程，Tiger反应绝对是亮点。不过，讲到拣队友合唱，他却首选跟他同样是「幼稚园鸡」的成员，仲话要跟对方齐试新嘢，究竟他想组咩CP呢?！撰文：杜杜 摄影：叶君海 发型：Denny Ku@Chic Private I Salon 化妆：Circle Chong@Annie G. Chan Makeup Centre、Cori Wong@Annie G. Chan Makeup Centre

AL新歌首度跟黄伟文（Wyman）合作，初时得知对方「Say Yes」，他第一个反应是「系真唔系」，之后更即搵监制Edward Chan攞料，「问佢我同Wyman前辈开场第一句应该讲乜嘢，应该自我介绍先定系做啲咩，我自己都腾晒，呢个系我嘅陋习，每次去接触未合作过或者未见过嘅前辈，都系腾晒成个人呆咗唔知点。」但跟Wyman接触过后令他放心晒，「佢超级专业得嚟又好锡住我，成个填词过程佢都不断同我解释份词想点，又问我想要啲乜嘢，呢个沟通过程系好享受，冇谂过同个超级大前辈有个来来回回嘅沟通，好多谢佢，佢比我想像中热情，唔系距离感好远，系个好sweet嘅前辈。」


MIRROR相处似《Megahit》内容

《Megahit》讲人与人之间沟通，AL觉得沟通过程最难就是坦白，因会怕被人拒绝或者被质疑想法奇怪，「好多时惊呢样嘢就收埋喺心唔讲，呢一年唔系净系出呢首歌令我领悟到呢样嘢，开始觉得坦白讲出嚟系好啲，小至平时日常工作对住唔同嘅工作人员，大至对队员嘅坦白。」他承认经过《调教你MIRROR》队友间坦白不少，「每位成员都好惊人哋唔知点谂，好惊俾人拒绝，有好多心事摆喺心入面唔讲，今年系个好时机，而家坦白程度唔单止系讲自己心事同烦恼，甚至开心都会讲出嚟，好似我平时多同Edan、姜涛工作，好少同Tiger或者Lokman，近呢一两个月多咗MIRROR齐人工作，有时见到佢哋觉得好窝心都会同佢哋讲。」


AL更自爆跟Tiger讲肉麻说话过程，「我试过直接同Tiger、Lokman讲『见到你哋感觉好安全，好sweet』，系好肉麻，但我戴咗头盔先，我同Tiger讲『我即将讲句说话你可能会觉得好核突，你又会可能唔信我，觉得我玩嘢，但系我都好想讲』，我好想同自己成员讲出自己感受，就发神经同Tiger讲咗呢番说话，跟住佢就报以一贯冷静嘅微笑，我就话『系呀，我讲完OK』哈哈！我好锺意呢个坦白嘅我，已经冇理究竟人哋会唔会拒绝或者点谂，今年MIRROR信任多咗，以前嘅恐惧冇咁惊，MIRROR嘅相处好似新歌《Megahit》讲嘅嘢，人与人之间沟通未必磨合到，未必大家性格一样，但试吓沟通可能会产生到新火花。」

大个仔识同Tiger沟通

不过讲到最惊对边个MIRROR兄弟坦白，AL亦首推年纪最轻的Tiger，「出道以嚟最少接触系Tiger，我同佢嘅年龄相距都比其他成员大，大家嘅喜好好唔一样，大家好少有啲相同话题可以倾，所以一开始有种见到面想讲嘢，但又唔知讲咩好，咁就算唔好勉强，头年半都系咁样，但好多嘢唔系你避开就OK，其实好多时唔使一定要有话题，可以问吓大家呢排搞啲咩，已经系一个开展话题嘅好开始。（梁祖尧安排姜涛同Tiger每次见面倾50句，其实你都需要？）系㗎！但系我唔使50句，20句就得，程度上唔一样。我都慢热㗎！都需要热身，但系今年系好啲，可能自己大个仔大胆咗，赞吓自己先。」


今年好多成员都推出合唱歌，AL私心就最想同阿Jer合唱，「要出一首大家完全未听过嘅风格，唔系跳唱歌，亦都唔系抒情歌。（出跳唱歌玩阿Jer？）抒情歌咪佢玩番我罗！哈哈！系大家未接触过嘅领域，一齐去学一齐去试嘅嘢，今年演唱会同阿Jer夹过一细part，我觉得同阿Jer合作好好玩，本身同阿Jer又好friend，私底下都系癫癫得得好幼稚，啲fans形容我哋唔系『小学鸡』，系『幼稚园鸡』行为，多啲时间相处会好开心。」至于早前歌唱老师Guddy接受《头条》专访时曾赞他中低音出色，他亦有意推出这类歌，「绝对系夸奖啦！花姐都有讲过话我比较擅长系中低音领域，自己好期待有机会出抒情歌，低音少少唔需要太澎湃都OK。」