孙慧雪嫌老公收藏品阻地方 被弹唔识嘢

当你返到屋企，客厅突然多咗一嚿巨型黑色「怪兽」，第一个反应都系会问：「乜料呀？」孙慧雪日前就遇到呢个情景，喺社交网上载老公嘅最新收藏品，占据客厅好多位置，连埋成幅墙咁大嘅纸盒同发泡胶，梳化都遮晒，认真头痕！

雪雪留言话：「当你返到屋企，见到旧嘢牙咗你屋企半个厅？你嘅反应会系⋯⋯⋯」雪雪即刻质问老公：「乜料？」而佢老公就答：「好型喎！」雪雪无言。不过，长期占据客厅都唔系办法，所以雪雪就逼老公将件黑色收藏品pack番入箱然后搬去迷你仓，雪雪仲爆老公嘅收藏品已经逼爆咗3个迷你仓，多到可以开展览，老公话全部都好保值，但自己就完全唔识欣赏喎。

其实呢件黑色收藏品大有来头，系纽约殿堂级涂鸦大师 FUTURA与香港公司 AllRightsReserved 合作嘅限量版模型「FL-006」，今年5月开售全球限量350个，定价为$15300港元，属于男士嘅全新玩偶;网上炒价现已达2万3千元，短短3个几月已升值近50%，雪雪老公果然有眼光，连金曲歌王林俊杰（JJ）都有一件透明版。