《造星》Loser复活战名单曝光 大姨妈星睿Travis又嚟

玩全女班的《全民造星IV》正举行中并将于11月播出，而《造星》一班囝囝亦参加咗由hmvod有份主办的《败者重生战LOSER REBORN》，新闻稿就咁样讲嘅，「 第一届ViuTV嘅《全民造星》有99名参赛者，结果有16位参赛者分别组成MIRROR同ERROR，成为两队香港天团。馀下嘅参赛者，依然有人坚持，怀住初心继续追逐自己嘅梦想！」因为咁，网上大型实况综艺节目《败者重生战LOSER REBORN》就此诞生。

究竟点样Reborn法?《造星》及《造星III》嘅19位Loser将会进行复活战，并由导师赵学而、徐天佑、小肥、Mastamic、小三及Yem教授唱歌、Rap、跳舞及演戏等技巧，重生战的节目音乐总监由年轻音乐奇才Gareth.T（汤令山）担任，曾于《造星》担任评判的张建声负责节目总监制一职。真人骚共拍20集，最后10位学员将会飞去韩国produce 101嘅训练基地Lionheart Media Group进行特训，Win咗就有机会出道做艺人。

据知20位 Loser除咗已曝光嘅《造星》总决赛分别排第七嘅应智越（细猫）及第6名嘅王雍泰（龙志权），仲有《造星》20强嘅罗启聪（狗毛）、管鋈（Wayne）、彭嘉桓（Moley）、张匡佑（Jason）、40强王焯南（Louis）、温明龙（Zero）及第一轮已Foul但喺《造星III》入围十强及在总决赛排第十嘅锺诺言（NY）外，本报亦收到风《造星》55强嘅大姨妈陈君浩（BU）、40强嘅黄星睿（星睿）、30强嘅施咏辉（大辉）、20强嘅范浩贤（Neal）、谢家俊（OT）及分别参加过《造星》及《造星III》嘅欧国成(Travi)等亦有份玩。

就一班《造星》囝囝玩重生战联络《造星》之母花姐，睇吓佢有咩忠告，但暂未回覆。主办单位将于明日举行记者会，《败者重生战LOSER REBORN》暂定嘅19位参赛者及五位导师将会出席。