独家丨ZW制作西人三部曲耻笑「伪人」 写歌串爆歌手唔识扮有料

四人乐队Zolarwind2.0(ZW)制作「西人三部曲」系列，近日推出第一步曲《马骝戏》就唱爆啲伪君子，歌词内容相当搞笑抵死，嗒落必定会心微笑！成员艺深大胆爆出乐坛荒谬现象：「有啲歌手唔识做监制、编曲就用嚟挂帅，甚至唔识打鼓喺红馆打鼓！不过，林家谦系例外一个。」采访：方骞平 摄影：叶君海

Zolarwind2.0成员艺深、阿冠、Tommy、波子解构「西人三部曲」系列，艺深说：「我哋会探讨身边人与事及社会话题，《马骝戏》歌词内容系鼓手波子喺工作上受欺凌嘅真人真事，其实身边有好多人好假，做埋啲马骝戏片面嘢，冇料扮有料，所以写嚟笑吓、发泄吓！」

提醒自己唔好做小人
波子大笑说：「我嘅经历系俾阿冠恰，所以只歌系阿冠写紧自己！因为阿冠唔锺意写啲大路嘢，呢首歌好有批判性，睇唔过眼要出声，仲用咗广东话嚟写词，想表达得更加贴切。我谂小人好似便利店咁总有一个喺左近，一部曲系唔够，最终做咗『西人三部曲』。」Tommy说：「都好嘅，尽量警剔自己唔好做小人角色，咪做啲乞人憎嘅嘢！」阿冠却回话：「我谂每个人都会有乞人憎嘅嘢，睇吓有冇表达出嚟啫。我觉得唱歌闹人唔难，在乎背后有冇意义。」艺深坦言喺呢行「见识」好多：「有啲歌星唔识做制作，但摆个名做唱片监制，讲到天花龙凤连行内人都笑！社会上有太多虚伪嘅人！」Tommy说：「其实除咗音乐圈，喺职场上都有好多擦鞋仔。」