锺培生加码100万冇声气 李俊亨随时应战：几时都系作战状态

林作和锺培生的百万拳赛昨晚终于落幕，大家睇完都觉得「流流地」，林作以「Running Man」和「金蛇缠丝手」的赖皮策略，成功打足四个回合，没有被锺培生K.O.，连锺培生都坦言有点失望。

实战结束，但口水战似乎仍是没完没了。一直睇锺培生唔顺眼，同是富二代出身、现职帝锋金融集团董事总经理的李俊亨（Henry）今日在社交网repost赛前锺培生向林作将赌注加码到200万港元，锺培生写着：「我重申一次我接受，如果我K.O.唔到林作我将会今年9月内同佢教练（Henry）打，如果我K.O.林作张（将）会由$1,000,000拳酬变成700,000拳酬。」Henry留言：「《集思广益》大家不如帮帮锺生手，谂谂有咩藉口可以唔洗（使）找数挑战我？」林作即转发兼和应：「依家难落台了。」

Henry今日接受《头条娱乐》电话访问，表示预了锺培生「走数」，他说：「关于打唔打，同畀唔畀200万，我觉得佢两样都唔会！虽然佢赢咗，但knock out唔到林作，如果佢再走数都好合情合理，因为佢都好惨㗎嘞。呢半年嚟佢公关、PR，形象由正面变负面，呢段时间嘅精神接近崩溃状态，又残又攰，又好似乱嗌有啲问题；再加埋佢嘅团队白衫教练会冲上台打人，似乎冇乜武德，成个公关有空间进步。」他表示不希望再纠缠落去，但亦希望能互相切磋打拳心得，不过他自言现在状态超fit，可以随时应战。他说：「我磅数依家同锺培生一样，我现在打都得，几时都系作战状态。」