【独家】赢官司唔安心 指陈洁玲有问题 锺舒漫获男友陪出入:佢知我住边

锺舒漫（Sherman）与陈洁玲的钱债纠纷终于完结，小额钱债审裁处裁决胜方锺舒漫可向陈洁玲索偿43,560元及诉讼费1,183元。阿Sher导演男友林灏轩（Steve）坦言有如释重负的感觉，不过，因为经过一年嘅精神骚扰，Steve仍然好唔安心：「虽然判决后暂时冇被滋扰，但陈小姐又知阿Sher住址唔知会做啲乜，𠵱家我会陪住Sher出入！」采访：方骞平 摄影：叶君海 场地：The Wave

锺舒漫形容今次事件如同出街被高空掷物击中，所以冇话错定啱，遇到就要去处理及学习：「好感谢一班朋友喺背后支持，佢哋比我更嬲；而妹妹锺舒祺（Sukie）帮我顶咗好多嘢」 Sherman透露跟男友曾经被陈洁玲挑拨离间搞到嗌交几乎分手，「我同男友患难见真情了解多咗，明白大家只系想保护对方，𠵱家我哋更加坚韧，共同目标系结婚。」

判决前夕继续骚扰

Sherman重提呢件事仍然好无奈：「2020年5月13日我向陈小姐提出拆夥及退钱，6月中佢就Block咗我，到今年7月解封后早午晚凌晨不停发短讯骚扰我哋、我妹妹及Steve 3位朋友，包括莫名其妙追讨我存仓费。佢仲喺自设嘅和头酒饭局中偷影，诬蔑我同妹妹做X，收几千蚊去陪酒饭局；另又指Steve食「软饭」、入侵佢email，呢一年佢带咗好多破坏畀我哋，好多证据畀外界睇到佢系乜人，亦都还我哋一个清白。」Sherman说，「佢讲大话讲到好投入，从『抢咪事件』、早午晚凌晨send讯息都显示到佢系情绪不稳，如果佢真心道歉我会原谅佢，不过至今都睇唔到，喺判决前夕我仲不停收到佢轰炸讯息，而8月25号审讯时佢冲入嚟我哋休息室破口大闹Steve『食软饭』，当日又喺法庭上偷拍我哋畀保安阻止。」

疑暗恋Steve撩SP

Sherman认为成件事系陈小姐对两人有执念，尤其系对Steve：「其实佢一早退股离场，根本同呢次金钱纠纷冇关，但佢咬住Steve唔放，锺意点闹就点闹，我怀疑佢暗恋Steve，可能Steve畀唔到成功感佢，佢呢种人希望全世界成为佢裙下之臣。」忍咗好耐嘅Steve也开腔：「我识咗佢只有几日，平安夜当日佢传暧昧短讯flirt我，话『你知唔知咩叫好睇唔好食？』、『咁你今晚会唔会发绮梦…』。佢又试过喺食饭期间问我『有冇谂过SP？』、『冇得搞嘢真系唔得』，我一直强调自己有女朋友，而佢当时亦同𠵱家嘅老公谢趠泛（Victor）拍紧拖。」本想低调处理的Steve被陈小姐自编自演「drama」烦足一年：「不过，我都赞佢够持久力嘅，我真心希望佢可以放低对我嘅执念，毕竟佢已经嫁咗人，尊重佢老公好啲！」至于陈洁玲回覆本报解释之前不停传短讯原因：「我希望佢可以正面回覆我，而唔系背后做啲偷鸡摸狗嘅事。」