【独家】新歌请女神任MV女主角曾比特被袁澧林怪冇follow

2021-08-27 23:45

曾比特（Mike）继出道作《我不如》后，早前推出第二首作品《我不是邱比特》，继续大玩惨情，他笑指可能Eric Kwok觉得他个样够可怜，于是安排再次扮兵，不过他都希望下首歌可以一改曲风试唱快歌。今次《我》MV搵来女神袁澧林（Angela）担任女主角，可惜Mike在女神面前竟然发生𤓓事，讲起都觉得尴尬。撰文：杜淑霞摄影：张咏森

Mike谓《我不是邱比特》感觉上有少少似是《我不如》的前传，「呢首歌讲紧明知一段关系最后冇结果，但仍然选择欺骗自己，嗰种自欺欺人感觉，嗰种唏嘘，首歌去到最尾都有少少自我安慰，可能之后我有机会。首歌系有少少似《我不如》前传，《我不如》系去到绝望，不如一个人嗰种感觉，但呢首歌系未去到咁绝望，依然相信彩蛋最尾会为我而开，仲识得自我安慰，两首歌系有少少心情上嘅转换。」

望今年内出快歌

新歌虽然继续惨情，但MV却搵来女神袁澧林做主角，Mike否认是自肥计划，「我都系拍摄前一两日导演先话我知，知道后Oh my god！袁澧林喎！好耐之前已经知道呢个女神嘅存在，不过一路冇follow（社交平台），所以认识咗佢畀佢寸我，『都唔follow我！」我个心痛一痛，有补番飞即刻follow番佢。」他又大赞女神人品和演技一样出色，「我拍嗰阵冇乜经验，前一次都只系同狗狗拍，所以比较紧张，佢好好行埋嚟同我倾偈，帮我舒缓吓啲紧张情绪，教我点样令到件事轻松啲，系个好好嘅女神嚟。好深刻有场佢要情绪崩溃，佢真系一秒将啲眼泪出咗嚟，我喺佢隔离都睇到，哗！会唔会太劲，令我好佩服。」

讲到先后两首都是惨情歌，Mike笑指Eric Kwok，「可能佢觉得我个样够惨，好值得人可怜，于是咁样安排。」不过下首歌Mike反而想试新曲风，「自己都好希望出番一首快歌，希望今年睇吓有冇机会出到，一啲惨嘅嘢喺呢两首歌度都呈现出嚟，其实我性格偏好动，唔开心完梗系要开心啲，所以希望下首歌畀啲轻快节奏大家，等大家知道原来阿Mike轻快得慢又得。」